又係蕭正楠？大台小生花旦重覆又重覆

近排套《幕後玩家》蕭正楠又擔正做主角啦，咪住先，上套同時段劇集已經係佢做主角嘅《巨輪》，連續兩套都係佢，大台係無小生定點？真係唔驚觀眾睇到厭？其實近年大台成日連續幾套劇都係嗰幾個演員，不如就睇吓今年邊個出鏡率最高啦：

女演員頭三：

季軍－李佳芯（3套劇集）：《潮流教主》、《律政強人》、《巨輪II》＋《學是學非》

已經成為長做長有嘅資訊節目《學是學非》，幾隻「是非精」都有唔少人氣，當中靚女Ali（李佳芯）就最受歡迎。所以，劇集監製當然Mark實Ali，成功令Ali今年出演3套劇集。雖然喺劇集《潮流教主》同《巨輪II》都只係配角，但已經成功贏得唔少觀眾嘅注意。而Ali更加喺劇集《律政強人》首次擔正做女主角，同劇仲有好戲之人廖啟智同方中信，已經穩袋唔少收視，加上又可以得到前輩教路，Ali首次擔正都得到唔少正面評價。睇嚟Ali出現得多，觀眾都似乎傾向贊同。

亞軍－蔡思貝（3套劇集）：《鐵馬戰車》、《潮流教主》、《純熟意外》

「煩音製造」蔡思貝竟然唔係第一真係有啲奇怪，因為硬係覺得佢成日都做女主角咁。蔡思貝雖然不停製造高頻煩音，演技又未夠班，但大台一於少理，繼續捧佢做女主角。今年3套劇，蔡思貝都擔正做女一，成功贏過Ali（三套得一套做女一）。然而，評價就比唔上Ali啦，《鐵馬戰車》同《潮流教主》繼續飾演初出茅廬、懶係熱血、又唔聽上司指令嘅職場新鮮人角色，一貫嘅角色令觀眾煩厭。雖然喺劇集《純熟意外》終於擺脫「雞仔聲」及「正能量」天真少女角色，但呢套劇集後來劇情突變成膠劇，蔡思貝嘅進步即被忽略。

冠軍－胡定欣（4套劇集）：《公公出宮》、《一屋老友記》、《城寨英雄》、《來自喵喵星的妳》

上年出爐視后胡定欣，今年年頭到年尾都見到佢嘅蹤影，幾套劇集都係唔同類型嘅角色，畀定欣發揮演技。年頭2-3月嘅《公公出宮》就做大當家金香，配視帝黎耀祥上演女尊男卑嘅喜劇；年中6-7月就有《一屋老友記》做男人婆朱燦燦；最不得了就係8月暑假黃金檔嘅《城寨英雄》，飾演表面吝嗇嘅包租婆，實為殺手嘅刁蘭，大有發揮演技機會，好似得知鑫鑫被殺爆Seed一幕咁，極有機會再下一城奪祝后；最後就有近排播出嘅《來自喵喵星的妳》做差婆焦瑤。雖然定欣一年4套劇都擔正做女主，但係反而無令人反感，可能因為套套戲風格唔同，定欣又做得好好睇啦～

男演員頭三：

季軍－蕭正楠（3套劇集）： 《公公出宮》、《巨輪II》、《幕後玩家》

本來仲以為蕭正楠老是常出現添，點知原來得3套，可能係近排連續2套劇令人有錯覺啦。年頭《公公出宮》蕭正楠其實只算係4大男角之一，不過套劇贏在搞笑鬼馬，特別係阿廉（曹永廉）小女人嘅演技，贏得唔少觀眾。之但係去到年尾嘅《巨輪II》又飾演羅威信，老實講上套劇集已經唔鍾意呢個角色，呢套角色更加劣化，再加上有埋陳凱琳，最後仲要將啲重點變成強姦戲⋯⋯而近排套《幕後玩家》仲誇張，真係當做公關就可以日日花天酒地咩？蕭正楠真係要好好揀吓劇啦⋯⋯

亞軍－陳豪（3套劇集）： 《潮流教主》、《完美叛侶》、《來自喵喵星的妳》

一家五口嘅陳豪當然要密密拍劇賺奶粉錢，不過都只係排第二。視帝陳豪3套劇集都穩佔第一男主角位置，但就唔係每套劇都吸引。好似年頭嘅《潮流教主》飾演教主葉朗，整埋個黑白色前衛髮型，十足十「老佛爺」Karl Lagerfeld上身咁。可惜劇情唔夠睇頭，再加上蔡思貝⋯⋯年中《完美叛侶》做事業心重而忽略家人嘅敖柏言，雖然有埋好戲之人邵美琪同黃智賢，可惜劇情似乎唔啱觀眾胃口，收視未如理想。到近排嘅《來自喵喵星的妳》做無情趣嘅薛丁甲，用返《鬼同你OT》班底，唔知吸唔吸引到觀眾呢？

冠軍－陳山聰（5套劇集）：《刀下留人》、《潮流教主》、《火線下的江湖大佬》、《殭》、《乘勝狙擊》

估都估唔到，今年出鏡最多竟然係陳山聰。雖然陳山聰唔係做男一，但勝在做密密做男配，以數量取勝，更經常有搶鏡表現。年頭喺劇集《刀下留人》飾演第三男主角司馬丑，呢套劇被激讚有深道，演員演技內斂，更被網民捧為「神劇」；之後喺劇集《潮流教主》做第三男主角馬承浩（Martin）搶去唔少風頭；4-5月喺劇集《殭》飾演奸角凌風，雖然套劇被批評膠，但陳山聰卻反而受到讚賞；同期播放嘅劇集《火線下的江湖大佬》，陳山聰又有份飾演第四男主角高佳，大展佢學咗多年舞獅嘅功架；嚟緊仲會喺年尾播出嘅劇集《乘勝狙擊》做第二男主角伍柏義（Hugo）。睇嚟入豪門夢碎嘅陳山聰，事業心爆發得好犀利吓。

圖片來源：Ali李佳芯＠Facebook、胡定欣@Facebook、TVB.com