【台灣旅遊】台北度假避世！最新礁溪溫泉酒店大比拼

台北人嘅度假勝地就係礁溪；呢個溫泉鄉對於台北人嚟講可以話係避世之用，可以完全忘憂，享受一日半日溫泉，當Refresh下。唔單止台北人，當然好似香港遊客都耐唔耐會去下礁溪，喺台北玩完入去爽下，再返出去繼續行程。所以礁溪溫泉鄉不時有新酒店，而且質素仲愈嚟愈高，如果唔係都好難搶客。今次介紹呢3間酒店，開業都係一年幾，新淨又舒服，睇下邊間啱你心水啦。

對住龜山島浸溫泉：山形閣

山形閣為台灣酒店集團福泰飯店嘅最新出品，去年5月開業，名為山形閣，就係融入宜蘭嘅山形地勢而建，外觀及內裡裝潢都以山為主題。酒店最大賣點係好多房間都可以望到對岸嘅龜山島，而房中設有私人溫泉，可以望住龜山島慢慢浸！酒店全高12層，122間客房，一共7種房型。另外每日都有免費Workshop畀住客可以參加木製品製造班，好開心呢！

舒適度：****（以5星為滿分）

客房採用全落地玻璃，透光度十足，加上海景及龜山島景都非常壯觀；每間房都有私人溫泉，仲送免費啤酒，浸完爽一爽！

設施：*****

客房設施好巴閉，Dyson風筒，沐浴品全部係新西蘭有機品牌Ecostore；另外山形閣套房有埋日式和室，似足日本溫泉酒店！

抵玩度：*****

最基本連早餐約$1,300 ，普遍比起其他礁溪酒店略貴，但對於新酒店有私人溫泉嚟講，算好抵玩！

預訂：按這裡

主打親子推介：寒沐

2017年11月先開業嘅寒沐屬於典型日式溫泉酒店風格，無論內外都係走低調而有質感嘅風格； 房間面積空曠十分大，採光度十足，加上酒店一眾為小朋友而設嘅遊戲區，目標擺明就係家庭客。酒店另一大特色係藝術品味，搵國際知名藝術設計團隊LTW合作，融入藝術及當地文化。而附近有一眾風景區例如五峰旗、龍潭湖等，係去遊山玩水嘅好選擇。

舒適度：****（以5星為滿分）

屬於美學路線嘅日式溫泉酒店，相信去過日本住嘅朋友都唔會陌生，所以呢種「無印」式酒店係唔少人嘅心水呢。

設施：****

兒童遊戲室係一大片綠草，有大型攀爬網；除咗溫泉池之外，仲有滑水道等玩樂設施，大人同小朋友一樣玩得開心。

抵玩度：****

最基本連早餐約$1,400 ，基本房型「語木居」已經有成420呎，仲有露台；算好抵玩！

預訂：按這裡

位置最方便：麒麟

礁溪話大唔大，不過周邊最主要可以行嘅就係溫泉中心，近火車站及巴士站；而呢間2017年年中開嘅麒麟就係位中心，可以步行溫泉街。呢間酒店有露天公眾溫暖，而且位處酒店最高，可以話係空中溫泉，遠眺蘭陽平原。另外麒麟賣點係超大SPA中心，入面有水療區、游泳池、健身室等。另外一個賣點係酒店有免費泊車，如果自駕遊的話就夠晒方便。

舒適度：***（以5星為滿分）

雖然係新，不過酒店唔算十分瑰麗，可以話不過不失，基本酒店質素，尚算乾淨企理。

設施：****

最厲害就係SPA中心，可以嘆足半晚都得；其餘設施就較基本，不如出去附近吃喝玩樂仲好。

抵玩度：****½

連早餐約$800 ，不過基本房比較細，只有258呎，而且無窗，景觀是零； 建議Upgrade訂$840高級房 ，300呎有窗，差好遠！

預訂：按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！