叱咤2023｜林海峰SOLO表演被彈 阿正一面倒被激讚：hold到個場又唔悶有氣氛

《2023年度叱咤樂壇流行榜頒獎典禮》喺元旦日晚已經圓滿舉行，以往「我最喜愛男歌手」都由林海峰擔任頒獎嘉賓，而佢頒獎前嘅talk show更係大家最期待嘅環節之一。今屆商台繼續搵佢頒發呢個獎項，不過佢今年嘅表演就被指扮黃子華同睇到好尷尬；相反網民今年一面倒激讚頒發「叱咤樂壇男歌手」獎項嘅阿正（黃正宜）。

喺噚晚，林海峰喺頒發「我最喜愛男歌手」前，一如以往有個SOLO表演，今年佢以張敬軒作為主角，指張敬軒只係喺2014年拎過一次，去到2018年佢遇到古天樂呢位強勁對手，林海峰仲話佢當時講咗「有冇搞錯」，而工作人員就表示係樂迷投票，所以佢就將獎項頒畀一個影帝。林海峰再話去到2020年張敬軒又遇到難關，因為當時爆發「MIRROR大流行」嘅社區流行，姜濤拎咗兩年，跟住Anson Lo再拎埋，笑指如果軒公要拎「我最喜愛男歌手」嘅話，可能要等MIRROR成員Frankie拎埋獎先到佢，即係要等多12年時間。之後，林海峰再指今年突然爆出尹光，一個姜B一個光B。最後，林海峰冇賣關子，連續講出三次得獎者名稱 － 張敬軒、張敬軒、張敬軒，最後將獎項交到張敬軒手中。

對於今屆林海峰嘅表演，唔少網民都留言表示失望，例如「佢做乜扮黃子華」、「呢個mc好無能 廢話多又唔好笑 俾返頭先個女mc搞啦」、「林狗真係佢唔尷尬，其他人尷尬」、「林狗咩事，又唔好笑，又曬時間」、「可摸以唔好扮黃子華」及「林狗好似回塘 阿正同艾粒好笑啲」等等；相反網民今年一面倒激讚頒發「叱咤樂壇男歌」獎項嘅阿正（黃正宜）。

阿正喺噚晚負責頒發「叱咤樂壇男歌」獎項，而內容更被指極具娛樂性。佢首先準備咗大粒墨，走到台下搵好友MIRROR成員Edan，搞笑話「底子好先Carry到，百大型男你應該Carry到掛？」，而Edan亦非常合作地將大粒墨貼到面上。之後，阿正走到Tyson Yoshi附近，並指佢嘅低胸造型嘅性感程度已經贏晒一班女歌手，要佢將粒墨痴上胸口，鬼馬嘅Edan就將墨貼喺Tyson Yoshi胸上，大會亦配合地將鏡頭 Close Up到佢胸前，有急才嘅阿正就話：「呢個係咪傳說中嘅胸懷大痣？係大胸懷大痣喎！」阿正點會放過魏浚笙（Jeffrey），佢表示要代表商台DJ嚟個愛的抱抱去祝賀Jeffrey得獎，而Jeffery就張開雙手，不過阿正就搞笑話「咦，好多人呀！永遠都係咁心急呀！」，結果繼續引來全場爆笑，氣氛非常高漲。

阿正嘅表現獲得網民一致讚賞，例如「阿正好正」、「正姐真係不停上位 今年有自己"talk show"環節」、「阿正真係主持得好好」、「笑死 好正」、「阿正擔大旗 一個人頒男金」、「森美小儀之後最撐到場嘅DJ」、「阿正真心勁」、「阿正急才真係有料」、「阿正幾好笑」、「阿正犀利 可以hold到場」、「全場最有氣氛帶晒啲歌手出嚟就係阿正呢段」、「呀正好掂 hold到個場又唔悶有氣氛」、「阿正真心好正 成個節奏好好 又好笑」及「正姐好嘢！呢part好好睇、好好笑，你介紹得好流暢。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！