唔止沈殷怡！細數新一代ViuTV高顏值女神 每個都好吸睛

大家睇咗大台咁多年，有咩女神都瞭如指掌，其實隔離台ViuTV都有唔少高顏值女神，質素完全唔輸蝕！ 不如而家就同大家數下ViuTV嘅新一代高顏值女神啦！

余逸思（Yoshi），除咗係一名模特兒外，仲係一名化粧師，佢參加16年ViuTV選美節目《美選D.n.A.》成為全場總亞軍後入行，之後參與多套劇集及節目拍攝，包括《開工》、《金剛旅神團》、《辣伙頭》、《Reboot》 及《假設性無罪》等等，「吸睛度」一啲都唔輸蝕。

沈殷怡（Shirley）自上年拍攝《詭探前傳》做秋官個女彭靜後，人氣急升，喺短短一年內拍攝多部劇集及節目，例如《娛樂風雲》、《辣伙頭》及《金剛旅神團》等等。除咗樣靚身材正之外，佢讀書仲好叻添，DSE考獲4科5**，全額獎學金升讀上海復旦大學法律系，擁有內地律師牌。之後回流香港，喺中大修讀法律系碩士，畢業後先去咗律師事務所實習一年。

無綫節目《美女廚房》中嘅「美女學徒」洛兒（Lokyii），出名樣靚兼擁有火辣身材，極高人氣嘅佢吸引大批網民追捧，IG有超過23萬追蹤者，由打碟DJ界轉戰娛樂圈，再成為宅男女神，早前洛兒強勢加盟ViuTV，立即成為新一代ViuTV女神。

鄧月平（Larine）參選ViuTV選美節目《美選D.n.A》入行，喺初出道時有「巨胸翠如」之稱，因為佢擁有36F上圍，真係一啲都唔惹少。不過近年她開始擺脫性感專注拍電影，早前佢為咗拍攝電影《墮胎師》，為咗完美演繹肥妹仔一角，佢不惜為藝術而犧牲，喺2個月內由101磅激增至143磅。另外，近排佢參加ViuTV煮食綜藝節目《辣伙頭》，仲成為首屆女廚神。

喺2016年加入娛樂圈嘅陳欣妍（Shirley），出道作品係《我們的6E班》。因為個樣甜美有氣質，加上身材標緻，成功得到網民關注。佢喺《辣伙頭》中表現突出，被網民們追捧成女神。另外，由於佢同沈殷怡深受網民熱愛，被封為「Double S」，ViuTV就幫佢哋開設新節目《美女郊遊遊》（暫名），計劃喺4月中首播。

陳海寧（Isabella）自大學畢業後一直從事演員工作，拍過幾套電影，憑港台電視《萬輻瑪利亞》開始被觀眾認識。除咗2019年幫ViuTV拍攝《仇老爺爺》之外，佢仲係《辣伙頭》八位參賽者之一。

美國大學畢業回流嘅蘇菲（Sophie）不時拍攝影片，放上影片分享網站，相信一班網民對佢唔會感到陌生。今次蘇菲由網上改為幫ViuTV拍攝節目《辣伙頭》，成功獲得觀眾關注。

前年參加ViuTV《廣告女皇》奪得季軍嘅蔡寶欣（Pony），入行後佢先後為《我食飯你埋單》演出及《十五分鐘熱度》主持之外，佢早前仲同麥長青（麥包）及金剛主持《C9旅行團》。

歌手吳浩康（Deep）前女友李昭南（Mishy），曾勇奪「全美華埠小姐」第二公主。美國加州大學戴維斯分校高級榮譽文學士畢業，本身喺美國做主播嘅佢，之後回流返香港發展演藝事業。有樣有身材嘅Mishy除咗為Viutv做過唔少節目主持之外，佢仲有幫ViuTV拍劇，例如《詭探前傳》 、《假設性無罪》及《黑市》等等。