喺對方面前 唔再需要自卑

拍拖最幸福之處，大概是有個人會在任何情況、任何條件下，都認為你是完美，甚至乎，缺點都變成優點。

你看有些女朋友會指著男友的大肚腩，說很喜歡；而總有段時期妳殘到爆，任何人都不想見，他卻完全不介意，仍十分自豪，握著妳說我女友是最好。

而當中的偉大，就在於事實上我們的確有很多缺點。而對方比你，比任何街外人都清楚，你脾氣有多壞，份人有幾難頂。但愈難頂，佢愈鍾意頂，仲覺得你愈嚟愈可愛。

盲目都有個譜，其實佢都有，之不過係大到離譜，夠容忍晒你啲缺點有凸之餘，仲有好多位記埋你有幾好。

女朋友問我：「係咪因為咁多人心甘情願容忍，所以先有咁多受傷嘅人？」

我裝作有深度，以教育電視的口吻回答，真正的容忍是相對，一個人在對方眼裡有多西施，就視乎你平日是否一樣懂得欣賞他。

女朋友：「咁周永恆嗰啲⋯⋯」
我：「佢嗰啲就份人真係西⋯⋯」

你說，愛情都講條件，對，但大多在於愛情發生之前。兩個人在一起之後，你會發現，之前誓死說過要找一個怎樣的人，現在看看身邊的對方，很喜歡呀，原來什麼都不重要了。

女朋友：「哦⋯即係話我唔好啫，冇你當初要嘅條件。」
我：「唔係呀⋯⋯係依家好到所有嘢都唔再重要咋。」

我是一個有點自卑的人，總是覺得自己不夠好，所以永遠也不會明白，為甚麼大把人靚仔過我，大隻過我，性格Nice過我，搵錢多過我，但佢就只愛我一個。

而她總是笑著說：「我覺得你好咪得囉，同埋⋯⋯你其實真係好好。」

外人的目光，就不必介意了，兩個人即管靜悄悄躲在幸福裡。外面的世界講Package，我們不如憧憬Marriage。

沒有人可以解釋到愛情的歇斯底里，只能說事實如此。最美好的愛情，不用在韓劇裡找，其實身邊已每天上演。

接受自己，其實很難，謝謝妳反而接受難頂的我。

雖然，我冇宋仲基咁男神。

FB: 莎比亞