嘉盈IG新相轉行清純路線被網民指封胸成功 親自回應：我想嘅話點着都得

YouTube頻道「FHProductionHK」成員「熊女郎」王嘉盈（Kaying）不時衝口而出爆粗嘅「MK妹」真性情及姣好身材極受網民關注，而佢一向衣著打扮都傾向性感，大騷豐滿上圍。不過，嘉盈近日IG分享嘅新相竟然收起性感，以清純新形象示人？

嘉盈曾經於熊仔頭「熊館」系列影片中分享，以前性感係基於自己無自信，宜家多人識咗，著得性感的話，喺條街畀觀眾認到好尷尬：「私底下唔係拍攝嘅情況出街，我會着晒褸，同埋我發現咗香港好少女仔着得咁性感。」唔知係咪呢個原因，嘉盈連影相都唔再派福利，新相造型傾向清純系，著上粉紅色背心側身拍照，並用腳遮擋上圍。而嘉盈呢輯新相洗走MK味，靠春麗頭及新妝容，被網民大讚可愛又靚女，同埋封胸成功；不過，嘉盈就親自回應留言：「冇封唔封，好自然的事情，我想嘅話點着都得。」但都有網民唔係好接受到嘉盈新Look，仲表示有啲似「屯門娜娜」。

今年10月，嘉盈曾擔任ViuTV真人騷節目《姊妹們的國際市場》嘉賓，與5名唔同國籍男參加者配對，節目中嘅表現就被觀眾力批好嘈好造作，成日喺人哋講嘢嘅時候插嘴。嘉盈事後於熊仔頭「熊館」系列影片中表示認為做YouTuber應該係娛樂大眾，所以忽略咗自身形象去做咗好多想節目好睇嘅行為；而試當真許賢以及阿慈等人都大讚嘉盈睇好多書同好多港產片，亦好留意香港文化。嘉盈仲提及，熊仔頭曾有段時間因私人問題不在狀態，令大家都想離開「FHProductionHK」，不過最後都對熊仔頭不離不棄，網民都紛紛留言大讚嘉盈係個好女仔，希望佢繼續做自己：「嘉盈真的係一個又真、又有才華的女仔」、「嘉盈請繼續做自己」、「你可以唔鐘意佢既性格或者其他野，但你絕對無得否定佢既努力。」、「一個咁有熱誠、對自己工作咁認真、對朋友同事嗰種義氣同可靠，一個咁好嘅女仔，唔好話做另一半，做到佢朋友我都會好開心！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！