【回顧2020.娛樂】細數今年無綫劇集7大膠位

無綫劇集經常被指製作馬虎又欠缺新意,2020年無綫雖然有唔少好評如潮劇集,例如《法證先鋒IV》、《十八年後的終極告白》及《踩過界II》等等,但喺同時劇集中都有好多好多「膠位」。有見及此,今日就同大家回顧一下今年無綫劇集嘅七大膠位啦!

《使徒行者3》手術刀鋸鐵管自救
爆seed(林峯飾)同阿兜(蔡思貝飾)被困雪房,點知阿兜好好彩搵到把手術刀,之後爆seed竟然諗到用把手術刀鋸斷鐵管,喺阿兜就嚟凍到要瞓著時,爆seed成功鋸斷雪房門電線兼走得甩,真係估唔到台慶劇都可以膠到咁。

《使徒行者3》截圖
《使徒行者3》截圖
《使徒行者3》截圖
《使徒行者3》截圖

《大醬園》玩「井字過三關」擊退山賊
萬卓楠(黃嘉樂飾)與高雙雙(江嘉敏飾)被威虎幫擄走,何廣沛同朱晨麗救佢哋失敗,仲被山賊捉埋囚禁。喺囚禁期間,高雙雙透過同山賊玩「井字過三關」嚟拖延時間。

《大醬園》截圖
《大醬園》截圖
《大醬園》截圖
《大醬園》截圖

《迷網》軒仔被自殺石頭勁細粒
軒仔(容天佑飾)唔想再做網上騙子,喺打算離開香港時被龍哥(何啟南飾)綁走,之後仲將佢推落海,但綁住佢嗰舊石頭勁細,完全冇可能令佢浸死,連網民都笑話軒仔可以抱住石頭游返上岸。

《迷網》截圖
《迷網》截圖

《黃金有罪》晶晶被撞飛
水敏晶(姚子羚飾)擁有Gordon(張兆輝飾)嘅犯罪證據,於是Gordon去搵佢要求將文件交出。呢個時候錢永進(蕭正楠飾)就同Gordon打起上嚟,期間晶晶突然走出馬路,被車撞到飛起。本來呢一幕係好慘,但無綫用慢動作,拍到姚子羚好似天外飛仙咁飄浮喺半空,搞到唔少網民都忍唔住笑。

《黃金有罪》截圖
《黃金有罪》截圖
《黃金有罪》截圖
《黃金有罪》截圖

《降魔的2.0》好似火箭兵團捉精靈
降魔人施萊斯(鄧佩儀飾)擁有唔少高科技裝備,佢以修理寬頻為由進入馬季(馬國明飾)屋企,與莫偉豪 (胡鴻鈞飾)決戰,期間拋出精靈球捉走莉莉(譚嘉儀飾),將佢帶返實驗室做研究。成個過程勁似火箭兵團捉精靈,唔講唔知以為睇緊卡通片。

《降魔的2.0》截圖
《降魔的2.0》截圖
《降魔的2.0》截圖
《降魔的2.0》截圖

《踩過界II》盲俠揸車追截匪徒
盲俠(王浩信飾)雖然睇唔到嘢,但擁有超強四感,所以日常生活同埋查案都難唔到佢。但佢竟然犀利到識得揸車,喺Maya(孫慧雪飾)被捉走嘅情急之下,佢直接坐到駕駛座揸車,佢只需要靠癲姐(蔡思貝飾)及Gogo(張振朗飾)嘅視像通話,教佢留意路面情況及即時導航,咁就可以喺又窄又多彎嘅路追車㗎啦!

《踩過界II》截圖
《踩過界II》截圖
《踩過界II》截圖
《踩過界II》截圖

《殺手》失明閻素之揸車
係呀!又係盲人揸車呀!麥明詩喺《殺手》中飾演失明人士閻素之,Parker(謝東閔飾)為咗避開殺手追殺,於是匿埋喺後座指導素之開車,期間搞到佢差少少同父親閻武(黎耀祥飾)迎面相撞。

《殺手》截圖
《殺手》截圖

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!

【相關搜尋】無綫劇穿崩位大盤點