【回顧2020．娛樂】細So偷食人妻一鋪清袋舉家移民 練美施事發後2周重開網店

繼「安心」事件之後，今年娛圈仍然有偷食醜聞發生。4月被商台炒魷嘅前DJ細So（蘇耀宗），本來重新出發，同太太陳穎楠(Wing)一齊做食品生意，點知9月有傳媒爆料話佢同一位「白滑KOL」阿B發生婚外情。雙方情慾對話截圖流出，當中有唔少大膽言詞同照片。仲有知情人士話細So同呢位第三者來往2年幾，差唔多每次都發生關係，後來阿B希望分手但細So放唔低，於是同Wing交代。

消息傳出後即刻有唔少網民估計邊個係「阿B」，原來真身係喺社交平台經營嬰兒用品同時裝生意嘅練美施(Macy）。Macy本身都係有夫之婦，佢接受專訪時仲爆出因為不倫關係感染婦科病，甚至暗示要人工流產！

本來以好男人好爸爸形象搵食嘅細So工作全停，但係佢得到太太原諒，喺IG出post寫道「我選擇相信，並肩繼續這段旅程」。後來有消息話細So夫婦決定帶埋2個仔移居英國，一切從新開始，細So喺早前曾經返港處理手尾，近期亦有電視廣告由細So擔任旁白，似乎生活慢慢重回正軌。

而女主角Macy事後一度將網店同個人IG帳戶關閉，不過唔夠一個月就重開網店facebook專頁，認錯之外仲話「做比說難，但我選擇做，努力做」。而家網店facebook仍然有4萬幾人like，生意亦似乎唔錯。