雅虎香港新聞 【回顧2020．娛樂】重溫劇集15位搶眼配角 何依婷／楊潮凱／張松枝／林景程...
自2020年初起，新冠肺炎疫症持續肆虐全球，大家都減少社交活動留家抗疫，而煲劇可能係最好嘅解悶對策。今年無綫及ViuTV推出咗唔少評價不俗嘅劇集， 當中產生唔少比主角更搶眼嘅配角角色，例如《法證先鋒IV》鄒浩（楊潮凱飾）、《踩過界II》黎美月（楊卓娜飾）、《機場特警》李至安（何依婷飾）、《二月廿九》辰叔（張松枝飾）及《暖男爸爸》暴龍哥（JuJu飾）等等。佢哋成功令觀眾留下深刻印象，而家我哋就精選咗15個今年搶眼配角同大家重溫一下啦！
《法證先鋒IV》鄒浩（楊潮凱飾）
楊潮凱喺《法證先鋒IV》「水泥童骨案」單元中飾演中度智障人士鄒浩，與失散23年嘅媽媽蘭姨（黎燕珊）重聚，之後更意外揭發一宗藏屍案。楊潮凱今次無論係外型定演技都花咗唔少心機，成功將角色發揮得淋漓盡致，獲得唔少觀眾大讚佢演得出色，同埋話俾佢同蘭姨嘅母子情感動到。
《法證先鋒IV》Elaine（康華飾）
康華喺《法證先鋒IV》中飾演嘅張綺寧Elanie，原本係Queen姐（陳煒飾）一個感情好好嘅閨蜜，不過佢鐘意咗Queen姐男朋友Louis（鄭子誠飾），之後佢哋酒後糊塗發生關係，更令Elaine有咗BB。而事後Louis表明只係愛Queen，Elanie當下立刻失落垂淚。康華嘅第三者演出令人睇到眼火爆，紛紛留言大讚佢演出有層次及好好戲。
《降魔的2.0》比利（易宇航飾）
德籍嘅易宇航（Julian Benedikt Gaertner）喺劇中飾演大話魔王比利，由一個惡魔變成小馬（馬國明飾）嘅乖巧僕人，經常幫小馬屋企打掃，仲只要一緊張佢就會咬住戴緊黃色膠手套嘅食指。唔少網民都認為佢好生鬼又可愛、為角色帶來新鮮感及表現十分搶鏡等等。
《踩過界II》黎美月（楊卓娜飾）
被封為無綫「御用寡婦」嘅楊卓娜，今次喺《踩過界II》單元「PTGF自殺案」中飾演單親母親兼繼續喊戲連場。劇中女兒陳詩涵（鄧卓殷飾）因網絡欺凌問題跳樓自殺，送往醫院一直昏迷不醒。黎美月（楊卓娜飾）喺法庭及天台崩潰式爆喊，唔少網民及觀眾都大讚佢成功駕馭角色，睇到佢哋心都噏埋。
《十八年後的終極告白》趙玉娣（尹詩沛飾）
由「御用妓女」變成「御用師奶」嘅尹詩沛，今次喺《十八年後的終極告白》飾演「豬肉婆」Tiger嫂趙玉娣，雖然佢成日聲大夾惡又乞人憎，仲成日鬧老公（杜大偉飾），但其實佢係好愛自己老公。佢喺劇中嘅每一場戲都令人印象深刻，特別係佢喺豬肉檔一邊斬豬肉一邊諗起老公嗰場爆喊戲，簡直係演技大爆發，唔少網民睇完都話好虐心。
《機場特警》李至安（何依婷飾）
無綫力捧上位小花之一嘅何依婷（Regina），《機場特警》係佢第一次拍劇，佢喺劇中飾演空姐兼KOL李至安（安安），同時亦係Easy（楊明飾）嘅女朋友。佢喺劇中有唔少大膽演出，例如要俾楊明摸大髀及要著比堅尼洗車，不過佢演出自然，唔似第一次拍劇。唔少網民都大讚佢表現亮眼，絕對係可造之才。
《殺手》小秉（林景程飾）
「御用專業人士」林景程（King）今次喺《殺手》唔係做專業人士，而係飾演細膽又懦弱嘅殺手學徒小秉。劇情講佢唔想再係一個廢人，所以就拜Dark Angel（龔嘉欣飾）為師，而Dark Angel就將小秉交俾閻武（黎耀祥飾）。不過閻武冇心教佢，仲經常當佢係跑腿。可惜小秉發現Parker（謝東閔飾）嘅秘密，最後更被Parker開車撞到重傷並虐殺至死。雖然佢戲份唔多，不過劇中戇直嘅性格非常惹人喜愛，所以唔少觀眾都好喜歡呢個角色，仲大讚佢好戲。
《殺手》紅姐（樊亦敏飾）
樊亦敏喺《殺手》中飾演霸氣社團阿嫂「紅姐」萬天紅，面上留有一道長疤痕，配上充滿殺氣嘅造型，一睇就知唔好惹啦。紅姐為人兇狠兼非常打得，所以身兼保鑣保護老公佛爺（李成昌飾），不過最後都被喬星（陳豪飾）用一粒子彈將佢同佛爺射殺。樊亦敏喺劇中有大量打戲，不過佢選擇親身上陣。佢嘅辛苦係值得嘅，因為唔少網民都讚佢做得入型入格同好欣賞佢。
《過街英雄》雄仔（方紹聰飾）
方紹聰（奶仔）過往飾演過唔少精神失常或者係智力有問題嘅角色，不過其實佢每一次嘅演繹都會唔一樣，而今次佢喺《過街英雄》中飾演智障人士雄仔，當中就講到宋凱甄（黃翠如飾）去監獄探望懷疑亂被警方拘捕嘅雄仔，睇下有冇機會問到殺人案嘅線索，點知期間雄仔情緒激動，不斷扯自己耳仔，仲嚇到喊話要返屋企。方紹聰嘅演技獲得網民讚演出到位，仲話睇到佢哋心都痛埋。
《愛‧回家之開心速遞》李莫仇（張詩欣飾）
處境劇《愛‧回家之開心速遞》有唔少演員已經成功入屋，而今年就有張詩欣憑癲喪嘅「島大女魔頭」李莫仇備受關注。早前佢化身情癡，不斷向朱凌凌（吳偉豪飾）發動愛的攻勢，令到朱凌凌大受困擾，希望可以擺脫佢。每一次李莫仇嘅出現，大家都想知佢用咩方法纏著朱凌凌，因為佢哋之間嘅互動真係好搞笑。
《使徒行者3》朱倩（麥美恩飾）
平時做開主持及司儀嘅麥美恩（Mayanne），今次喺《使徒行者3》挑戰臥底角色。佢飾演嘅朱倩被爆seed（林峯飾）安排混入模特兒公司查出失蹤台灣姊妹花下落。後來更被賣去做妓女，可惜救人時被發現其臥底身份，被器官販賣集團捉走，最終被活生生將器官摘取以致慘死。佢除咗繼續發揮搞笑本色之外，佢仲成功演繹出被摘器官嗰刻嘅孤獨、掙扎及無力反抗。雖然Mayanne只得兩集戲份，不過已獲觀眾認同演技。
《黃金有罪》莉莉（劉芷希飾）
前年開始參與劇集拍攝嘅劉芷希（Kimmy），喺《黃金有罪》中飾演夜總會紅牌舞女莫莉莉，暗戀錢永進（蕭正楠飾）。有唔少場口都需要性感衣着登場，當中包括喺沙灘以紅色比堅尼泳裝上陣。劉芷希憑性感演出獲得網民關注，人氣急升。不過早前佢已經冇與無綫續約，選擇返回吉隆坡繼承父親嘅中藥生意及與機師男友結婚，暫別娛樂圈。
《暖男爸爸》暴龍哥（JuJu飾）
素人小演員JuJu（Julian）喺《暖男爸爸》中飾演單親爸爸阿榮（鄭中基飾）嘅3歲版仔仔「暴龍哥」，佢憑天生一頭攣毛、混血樣貌、超萌奶音，加上天真唔造作，成功俘虜一眾網民心，瞬間成為大家熱門討論對象，IG追蹤者人數瞬間急升。
《二月廿九》辰叔（張松枝飾）
雖然《二月廿九》主角劉俊謙、吳海昕同埋徐天佑充滿新鮮感，不過飾演Yeesa（吳海昕飾）爸爸辰叔嘅張松枝仲搶鏡，佢除咗演譯一個經常酗酒及對女兒發牢騷嘅蒼老爸爸之外，仲以年輕27年嘅模樣登場。唔少網民唔止激讚佢嘅演出，更大讚佢保養得好好，有型又靚仔。
《地產仔》Alice BB（區明妙飾）
被封「港版周子瑜」嘅區明妙（Miumiu），過往喺無綫多次飾演角色嘅少女版，今次佢喺ViuTV嘅《地產仔》以青春嘅Cosplay打扮現身嘅Alice BB ，除咗造型夠晒搶眼之外，佢演拜金女亦入型入格，經常扮慘咁喺「雞哥哥」（胡子彤飾）手中獲得金錢同名貴手錶。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
