【回顧2020.娛樂】重溫無綫劇集10位搶眼奸角 龔嘉欣/馬國明/譚凱琪/謝東閔...

·6 分鐘文章

2020年即將完結,因為新冠肺炎疫情嘅關係,唔少人都減少外出留家抗疫,相信大家都多咗時間睇電視。今年無綫推出唔少出色劇集,當中誕生咗唔少令人印象深刻嘅奸角,例如《大醬園》細么、《使徒行者3》魏德禮、《降魔的2.0》海魔Thalassa及《十八年後的終極告白》林朗生等等。呢班演員完美演繹奸角角色,睇到觀眾們咬牙切齒,而家就同大家重溫一下今年10位搶眼奸角啦!

《大醬園》葉細么(龔嘉欣飾)
今年龔嘉欣演技大突破,當中包括年頭喺《大醬園》飾演大奸角葉細么。最初細么同小滿(朱晨麗飾)情同姊妹,仲齊齊入醬園做學徒。不過佢後來追求名利,變得越嚟越心狠手辣,例如為取代正室位置,不惜設局殺害專員太太郭秋雁(于淼飾)及將殺人罪名嫁禍俾曾強姦自己嘅劉星威(阮政峰飾)。今次可以話係龔嘉欣嘅代表作,佢嘅演技及眼神令人毛骨悚然。

《大醬園》葉細么(龔嘉欣飾)
《大醬園》葉細么(龔嘉欣飾)

《黄金有罪》榮木桐(張兆輝飾)
「好戲之人」張兆輝喺劇中飾演為錢不擇手段嘅榮木桐,佢係一位泰國華僑,但因父親嘅悲慘遭遇而回流返香港,並立志喺香港創一番事業。佢聰明又懂得睇準時機,不過極度貪婪,不斷利用及出賣身邊嘅人去達到目的,成為香港富豪。張兆輝喺劇中將呢個不擇手段嘅角色發揮得淋漓盡致,獲觀眾大讚演技,仲話佢可以憑榮木桐一角爭視帝添呀!

《黄金有罪》榮木桐(張兆輝飾)
《黄金有罪》榮木桐(張兆輝飾)

《使徒行者3》魏德禮(馬國明飾)
《使徒行者3》就延續上輯劇情,講述魏德禮(馬國明飾)係魏德信(陳豪飾)同父異母嘅細佬。為配合角色,馬國明染上一頭搶鏡嘅灰白髮,呢個帶幾分邪氣嘅造型相當有型。喺劇集初期,佢以「黑市器官中介人」克萊因登場,其後又自揭身份係保安局首席調查官韋作榮,其實佢真正身份係「劇集終極Boss」。

《使徒行者3》魏德禮(馬國明飾)
《使徒行者3》魏德禮(馬國明飾)

《十八年後的終極告白》林朗生(譚俊彥飾
譚俊彥喺劇中飾演林朗生Sam,18年前與朋友們一齊埋屍後,佢發奮圖強並成為忠忠直直嘅會計師,不過其後骸骨被意外發現。佢為咗掩飾秘密,不惜大話冚大話及殺人,例如喺船上殺害賴國明(唐嘉麟)及錯手殺死阿一(陳山聰飾)等等。壞人都係會有報應,最終佢要坐監,為自己做過嘅事負責。睇過譚俊彥嘅演出後,唔少網民都大讚佢做得好好及眼神表情交到戲等等。

《十八年後的終極告白》林朗生(譚俊彥飾)
《十八年後的終極告白》林朗生(譚俊彥飾)

《降魔的2.0》海魔Thalassa(譚凱琪飾)
新手媽媽譚凱琪(Zoie)喺《降魔的2.0》中一人分飾多角,分別係經常飲醉酒嘅的士乘客阿花、古代降魔人妻子允瑩及大反派海魔Thalassa。喺劇集尾段,Zoie以海魔造型登場,唔少網民都話佢靚得嚟又帶少少邪氣,更封佢做「最美反派」。其實除咗造型吸引之外,戲份甚重嘅佢將幾個角色嘅行為及性格完美演繹,演技備受肯定。

《降魔的2.0》海魔Thalassa(譚凱琪飾)
《降魔的2.0》海魔Thalassa(譚凱琪飾)

《機場特警》宋天機(許家傑飾)
許家傑喺劇中飾演大反派宋天機,佢自細立志做警察,不過因為馬容義(楊明飾)不小心駕駛,導致佢身體殘障,考唔到入警隊。相反馬容義就順利考入警隊成為機場特警,令佢非常妒忌同憎恨,再加上其他打擊,佢要殺警以洩心頭之恨。奸險又兇殘嘅宋天機,除咗嘗試綁架安安(何以婷飾)之外,佢仲裝炸彈令Man Sir(關禮傑飾)被炸死及打算綁架外國政要。唔少網民都大讚許家傑嘅演技有進步,指佢眼神充滿住演技,睇到人不寒而慄,同《愛·回家之開心速遞》嘅送水輝有好強烈嘅對比。

《機場特警》宋天機(許家傑飾)
《機場特警》宋天機(許家傑飾)

《殺手》佛爺(李成昌飾)
資深綠葉王李成昌喺劇中飾演黑幫大佬佛爺,凶神惡煞嘅佢,做事心狠手辣、橫行霸道及為人記仇,真係每個人都怕咗佢。為咗要脅喬星幫佢做嘢,佢派人捉走丁雅雯(江嘉敏飾),雖然喬星(陳豪飾)搵到丁雅雯被困地點,不過佢已經死咗。喬星認定係佛爺同紅姐(樊亦敏飾)做嘅,最後喬星用一粒子彈將佢哋射殺。唔少網民睇完李成昌嘅演出後 ,紛紛留言大讚佢演技大爆發同埋超級搶鏡。

《殺手》佛爺 (李成昌飾)
《殺手》佛爺 (李成昌飾)

《殺手》關啟揚(謝東閔飾)
謝東閔喺劇中飾演富二代關啟揚Parker,原本係一個斯文柔弱嘅人,但劇集尾段佢搖身一變成為極度兇殘嘅「殺手獵人」。佢除咗殺人成癮之外,佢仲會收藏受害者嘅遺物作為紀念,真係睇到到觀眾心都寒埋呀!

《殺手》關啟揚(謝東閔飾)
《殺手》關啟揚(謝東閔飾)

《反黑路人甲》喪鐘(徐榮飾)
徐榮喺劇中飾演脾氣暴躁兼心狠手辣嘅社團大佬「喪鐘」,為咗成為四聯邦坐館,佢壞事做盡,例如捉走高彬(張振朗飾)及威逼他人殺蔣世龍(王浩信飾)等等,真係奸到出汁呀!唔少網民都話佢成功擺脫「馬強」,將角色演得非常有氣勢同乞人憎。

《反黑路人甲》喪鐘(徐榮飾)
《反黑路人甲》喪鐘(徐榮飾)

《法證先鋒IV》Michael(張頴康飾)
張頴康喺劇中飾演美食界KOL Michael,一直視Emma(張曦雯飾)如親妹。不過細個嘅時候曾被童黨迫害,導致心理異常,仲以殺人去壓抑自己情緒。為咗保護Emma,佢竟然多次狠下殺人動機,例如殺死羅清秀(李綺雯飾)及秋姐(謝雪心飾)。之後,佢仲強迫高安(黃浩然飾)跳樓,最終自己墮樓身亡。

《法證先鋒IV》高安(張頴康飾)
《法證先鋒IV》高安(張頴康飾)

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!