天堂鳥Tyrese與KOL Pumpkin Jenn疑分手 女方曾大爆對方戶口冇咩錢好手緊

前天堂鳥成員歐喬鋒（Tyrese）與KOL Pumpkin Jenn於2020年10月各自喺IG公布求婚成功好消息，Pumpkin Jenn喺12月嗰陣仲拍片分享試婚紗及影Pre Wedding過程，希望疫情完結先舉行婚禮；勢估唔到近日有傳二人已分手兩個月，Tyrese更加出PO寫道：「自游…自在的感覺真是好」，未知係咪有所暗示。

對於分手一事，Tyrese回應傳媒提問，指自己無事並感恩擁有的一切，依家想專注做好自己同埋事業，至於其他提問就唔作回應。向來高調放閃嘅Tyrese與Pumpkin Jenn已互相unfollow，Tyrese嘅IG亦全數刪除與Pumpkin Jenn合照，仲喺其中一個帖文分享指：「原來近這年幾乎都沒有自己的單獨照，漸漸發覺自己忽略了自己」；而Pumpkin Jenn嘅IG就保留少數與Tyrese合照。不過，據悉Tyrese今年7月生日，Pumpkin Jenn無為對方慶祝，亦未有喺Tyrese自家園藝擺市集嗰陣撐場，Pumpkin Jenn喺9月初與KOL Minnie去韓國旅行，亦未見Tyrese隨行。

Tyrese與KOL Pumpkin Jenn曾經拍攝情侶Q&A片段，二人大談收入差距問題，Tyrese回應指：「呢樣嘢都係我努力嘅位，咁你（未婚妻）事實上喺事業成就同搵錢能力都比我高，所以我都好希望我哋可以一齊有更好嘅生活，所以我就要努力啲去做嘢，去建立我自己嘅事業。」當時，Pumpkin Jenn大爆要等Tyrese儲老婆本先結婚：「佢真係而家戶口都冇咩錢，佢而家好手緊」，Tyrese解釋指係因為公司剛剛經營，洗費好大，唔想婚禮費用由Pumpkin Jenn出晒，又唔想好寒酸咁樣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！