姚焯菲出席學校晚會黑色晚裝眼前一亮 炎明熹小背心曾被指「禾罕冚珍珠」

女團After Class由姚焯菲（Chantel）、炎明熹（Gigi）、詹天文（Windy）及鍾柔美（Yumi）組成，After Class成軍唔經唔覺已經超過一年，不過較早前Chantel表示自己對時裝及Business有較大興趣，並已經飛往紐西蘭升學，暫停演藝事業一段時間，而另一成員Gigi亦表示有意赴內地升讀大學，唔少粉絲都擔心After Class名存實亡。雖然佢哋少咗團體活動，不過成員們都繼續有唔少搞作，一班粉絲依然清楚佢哋嘅動態。

姚焯菲雖然暫停演藝事業，不過佢都有繼續更新社交網站向粉絲報告近況。已經適應紐西蘭生活嘅Chantel，近日參加學校舉行嘅Annual Ball，Chantel當日悉心打扮，佢以一襲黑色吊帶低胸連身長裙現身，仲同一班同學打成一片，影咗唔少靚相。

「聲夢人氣王」炎明熹上年憑參加內地真人騷《聲生不息》一炮而紅，獲得唔少演出機會，好似早前佢就前往珠海參與《芒果音樂季》，剛剛踏入18歲嘅佢，喺台上唱出三首個人作品，兼與《聲生不息》好拍檔「魔動閃霸」合體演出。雖然佢嘅表演非常精彩，不過唔少網民更留意著小背心嘅佢，因為身形向來偏高偏瘦嘅佢，今次著上白色小背心，成功突顯其曲線身材，被網民指佢係「禾罕冚珍珠」。

「聲夢小花」鍾柔美上年正式單飛出道，除咗忙住返學之外，佢亦要同時兼顧演藝事業，好似Yumi第一次做主持嘅選美真「狗」騷《超級毛特兒大賽》已經喺噚日首播。另外，青春又可愛嘅佢日前仲去咗澳門朝聖睇韓國天團BLACKPINK演唱會，當晚佢身穿牛仔短褲，大騷青春本錢。

詹天文早前推出首支派台作品《沒有你的新學期》，歌曲以青春校園風作為為主題，甚得網民喜愛。日前Windy上載跳舞短片到IG與網民分享，片中嘅佢身穿黑色小背心及牛仔短褲，喺露台上跳舞，唔少網民都留言大讚佢舞技進步咗好多。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！