娛樂圈一樣有真友誼 5對純友誼閨蜜藝人

韓國女神朴信惠出咗名有好多男閨蜜，早前因為知道朴信惠狀態麻麻，Beast成員龍俊亨就特登喺《Doctors》拍攝期間，為朴信惠送上餐車打氣，被信惠大讚「帥氣的男人」。所以呢，成日都話男同女之間無純友誼？以下5對娛樂圈嘅異性密友就話畀你知邊有咁嘅事：

1. 黃翠如 洪永城

每個男人心裡都有個黃翠如⋯⋯由佢兩個引發嘅一系列潮文相信大家都睇唔少，好多網友都FF佢哋似有還無嘅愛情。但Sorry，佢哋真係只係好朋友，之前仲曾經接受訪問話呢世都唔會同對方一齊。佢哋喺有線一齊拍旅遊節目而相識，至今識咗成十年啦，佢哋形容大家更加似係親人關係，可以打打鬧鬧，又可以坦蕩蕩咁分享自己的睇法，有咩比咁嘅關係更完美呢？

2. 張敬軒 王菀之

軒仔同王菀之當年因為同屬環球唱片旗下，感情又好好，所以06年開始就傳出緋聞，軒仔仲講過王菀之如果35歲前嫁唔出，就會娶她為妻。其實佢兩個真係好老友鬼鬼，由初初出道開始就一直彼此扶持到而家，見證住彼此成長。之前王菀之結婚，軒仔仲係Instagram留言祝福：「我的最愛找到了她的最愛」，更上載咗張扮搶新娘嘅相，真係好好感情呢。

3. 楊千嬅 陳奕迅

呢一pair更加犀利，網上流傳嘅一篇長文《有一種相戀卻無法在一起的愛情，叫做陳奕迅與楊千嬅》，講到佢哋嘅愛情故事似層層咁，搞到睇完都眼濕濕，但事實係佢哋都搵到深愛嘅另一半。不過佢哋就真係非常好朋友，由參加歌唱比賽認識，再一齊簽華星，入行到而家都識咗超過20年。千嬅曾經喺頒獎禮公開多謝Eason開解佢，2014年拍tvb特輯時都搵咗Eason上去，因為覺得喺人生路上佢都好重要。

4. 鄭元暢 林依晨

《惡作劇之吻》係好多人嘅回憶，當年覺得笨蛋湘琴同天才直樹真係好襯，甚至想佢哋係現實都一齊。而林依晨同鄭元暢自此成為非常好嘅朋友，超過十年嘅感情有如家人，仲試過喺宣傳新作嗰陣，不約而同地著咗同色系嘅衫或鞋。佢哋早前仲合體一齊參加真人秀《非凡拍檔》，不時展現出好默契，林依晨仲唔覺意衝口而出叫咗鄭元暢「直樹」呢！

5. 里安納度 琦溫絲莉

「You Jump, I Jump.」出自《鐵達尼號》嘅經典對白相信大家耳熟能詳，呢套戲當時不但轟動全球，亦展開咗里安納度（Leonardo DiCaprio）同琦溫絲莉（Kate Winslet）至今20年嘅友情長跑。琦溫絲莉喺2009年奪得金球獎戲劇類最佳女主角時，喺台上公開多謝里安納度：「我很高興我能夠站在這裡對你說我有多愛你，十三年了，我還是很愛你。」而里安納度即時喺台下回贈飛吻。早前里安納度首奪奧斯卡影帝，宣布一刻琦溫絲莉不但肉緊地緊握拳頭，仲眼泛淚光，可見佢哋感情深厚。

圖片來源：洪永城Instagram、張敬軒Instagram、丁子高Instagram、鄭元暢微博、Kate Winslet Instagram