專訪楊安妮WinWin｜經歷大手術感激親朋好友「關心唔係必然」 與男友KC相繼入行理解更多

參加《全民造星4》後出道嘅楊安妮WinWin入行後機會不斷，先後拍攝多個綜藝節目，包括《日本winwin企画》、《P1X3L 5G上台計劃》同《馬友旅友部》等等，同時上年亦都以歌手身份出道，接連推出三首派台歌，曝光率非常高。不過佢亦都自爆上年年尾做咗個大手術，好彩嘅係暫時已無大礙，更加令佢覺得「真係要珍惜生命」，亦都知道好多事情「唔係必然」。

先天疾病困擾咳血 多謝親朋戚友：唔係必然嘅事

WinWin年初喺社交平台就自爆去年因為先天疾病而經常咳血，對生活工作都帶嚟唔少影響，甚至嚴重到「一瞓低就會咳血」，嚴重影響睡眠同生活，所以年尾就毅然決定要做手術根治問題。幸好，手術過後佢亦都大致康復完成，只係仍然容易喘氣，大動作伸展拉筋動作依然未能好順暢咁做到。憶述當時手術後嘅時期，WinWin就直言學識要「珍惜」，珍惜生命同埋身邊嘅人，佢亦都好多謝關心自己嘅屋企人同朋友：「日日起身熬湯真係唔係一件容易嘅事，喺醫院每日一瞓醒就會見到媽媽，跟住到夜晚先走，全日流流長，Feel到我爸爸媽媽真係好擔心，同埋所有親戚個個爭住嚟探我。 一出事好多朋友都好關心，我就會有一種好窩心嘅感覺，大家關心自己唔係必然嘅事。」除咗屋企人同朋友，WinWin亦都冧爆多謝男朋友KC嘅照顧，等佢可以做「少奶奶」安心養病。

手術後趕開工全因責任心 望衝破舒適圈不斷挑戰

手術後WinWin稍作休息好快就重回工作，佢就話全因一份責任心：「唔想因為呢個病帶到麻煩俾人哋，如果減少工作係對自己健康著想，但係都會覺得內疚、麻煩到人，日本有句說話『唔好令他人造成迷惑』，盡自己能力去出席。」一直以跳舞為主嘅WinWin去年開始更加挑戰跳唱，對於一直鍾意衝破舒適圈嘅佢嚟講好有新鮮感，亦都好想繼續鑽研落去。原以為對WinWin嚟講最難嘅部分必定係唱歌，不過佢就直言話兩方面都好難：「跳舞同唱歌分別都係難㗎啦！唱歌本身自己少接觸，跳舞就係當你接觸咗好耐都會覺得好難，當你愈熟你就愈會搵到嘢去挑剔，兩樣加埋就仲難，所以我好Respect所有跳唱歌手。」至於點克服難關，WinWin就話第一次錄音好緊張，不過發現最緊要克服心魔，衝破自己心理關口，當然亦都唔少得要繼續鍛鍊技巧。

暫時以跳唱歌為主嘅WinWin就透露其實嚟緊想試吓挑戰 R&B 風格，更加希望可以將自己嘅諗法融入創作，例如係親情、回憶等等，亦都希望可以嘗試一下填詞同做MV導演等等。被問到最想合作嘅藝人，佢就二話不說咁話：「好想試吓同Jeremy（李駿傑）！因為我鍾意Jeremy，真係好欣賞佢，跳唱嚟講佢真係一個我好Respect嘅人，覺得佢好勁同好正！」

與男朋友KC相繼入行後理解更多 維繫感情全靠兩人相似

嚟緊就嚟到情人節，WinWin就坦言同男朋友KC一直都冇咩特別慶祝：「可能出街食餐飯。」而被問起點樣維繫感情，WinWin就話冇咩心得，可能係兩人比較相似：「跳舞我哋鍾意同一個Style，鍾意嘅音樂風格都好類似，就連講嘢方式都好似，連笑點都係對方嘅笑點！」WinWin更加話KC入行後兩人理解同交流更多，更加自爆入行前兩人從未喺對方面前唱歌，亦因為怕醜唔會俾對方聽到自己唱歌，就連一齊唱K都唔會；不過入行後理解多咗，更加會一齊討論唱歌同音樂：「以前可能係我出咗去佢就會喺屋企唱，佢出咗去我就會喺屋企唱， 總之就一定一定唔可以俾人聽到，而家就會問大家意見，因為大家喺呢行就會理解多咗大家嘅難處，一齊傾唱歌，討論吓做音樂。」嚟緊如果有機會，WinWin亦都想同KC有更加多合作，好似係旅遊節目同音樂等等，擦出唔同嘅火花。