專訪｜孝子創無廣告巴士App服侍阿媽 每日逾萬人使用：希望令社會開心啲

前年阿進的媽媽有次趕時間出門，開九巴 App 看到廣告彈出就不耐煩。她問阿進：「44M 仲有幾耐到？」阿進答：「你要等廣告，我都要等。」她抱怨：「唉，無鬼用，又話讀電腦讀咗咁多年，都唔知讀乜。」

阿媽率先試用：窒窒哋，都幾慢

阿進當下聽罷「谷住道氣」，後來發現九巴已經開放數據，包括巴士到站時間等，於是花了 2 至 3 天整理九巴、城巴和新巴的公開數據，開發網頁版 hkbus.app 的原型（prototype），可無廣告查閱巴士到站時間。媽媽率先試用，直率回饋意見：「窒窒哋，都幾慢喎」。

媽媽和身邊朋友成為首批用戶，阿進吸收意見逐步改良後，購買網址正式推廣 hkbus.app 網頁版。他有朋友在連登討論區發文推介，至 2021 年 11 月底每日獨立用戶約 500 人。他將相關原始碼上載至原始碼寄存服務平台 GitHub，希望有人接力開發成一個手機 App。

5 萬人下載 維持零廣告

其時一名中五生主動接力，放暑假期間把網頁版變成手機 App。阿進為了不辜負這位同學的一番心意，開始支付上架費，讓用戶可在手機下載，現時 Android 總下載人數近 3.2 萬人，iOS 近 1.8 萬人，合共約 5 萬人。阿進估算，九巴 App 彈出廣告一般等 5 秒左右，若果上、下班各等一次廣告時間，即每人每日浪費 10 秒，按 hkbus.app 每日獨立用戶 1.8 萬人計算，每日累計節省了 50 小時。

他希望用戶善用節省的時間，多關心身邊家人，「10 秒鐘度個笑話氹吓身邊嘅人，攬吓老公、老婆、仔女呀，都係開心嘅，總有啲 10 秒鐘可以做到嘅嘢。」用戶若因等廣告而錯過巴士班次，浪費的時間就不只 5 秒，「嗰 5 秒（廣告）令我嘥 10 分鐘（等車）」。

用戶數量持續增長，阿進未來仍會維持零廣告，「本身做嘅原意唔係為咗搵錢，都係服侍阿媽嘅啫。」倒是媽媽又有意見：「點解可以無廣告？無錢咁點搞？」阿進盡量維持低成本營運，目前沒有租借伺服器，每年支付上架費、購買網址費用大約 1000 元，他亦設立沒有內容的 patreon 賬戶，目前有 8 個有心人每月支付 1 美元支持營運此 App，扣除每年訂閱收入約 600 港元，實際開支約 300 多元。開發程式得到的回報難以量化，阿進希望令社會「開心啲」，此 app 最終亦獲媽媽好評，「一開始時（評價）係 OK 啦、勉強啦；而家佢會介紹畀同事用。」他滿足稱：「我身邊我愛嘅人、觸及嘅人，佢感受到好處就足夠。」

「佛系」經營 貼錢宣傳撐獨媒

現時 hkbus.app 包含巴士、小巴、輕鐵、港鐵的到站時間，亦提供點對點巴士路線搜尋，未來研究增設「到站提示」功能。阿進形容是「佛系」經營此 App，以不帶來財務負擔，不阻礙工作和生活為原則，每周平均花 2、3 小時了解用戶意見及改良程式。今年 11 月他「貼錢」在《獨立媒體》投放廣告宣傳，「獨媒睇咗好多年啦，咁佢財政拮据都唔係第一日嘅事。」廣告刊登逾兩周後，此 App 每日獨立用戶增長逾 3 成至 1.8 萬人。今年阿進亦獲 Revive Tech Asia 頒發「年度開源英雄」（Open Source Hero of the Year）。

阿進大學修讀計算機科學，現時在生物信息公司擔任總經理，主要項目是開發基因突變分析平台，「可能會幫到啲小朋友搵到啲遺傳病，或者有啲癌症嘅基因突變」。他指過去 10 年查找基因突變的成本減少 75%，對有需要人士意義重大，「有啲夫婦慣性流產，因為有某個基因突變，懷孕 3、4 個月一定會流產，知道咗原因可以做試管嬰兒，對佢嚟講影響係一世嘅。」

工餘開發多項程式：幫吓人幫吓自己

hkbus.app 只是阿進工餘項目之一。他曾參與民間「g0vhk 」項目，以技術解決社會問題，例如開發香港地址解析器（HKAddressParser），可統一不同格式的地址、中英翻譯地址等，方便記者「查冊」及學者和民間團體做研究。

近年自殺個案飈升，他又協助朋友開發 Google 插件 SUEY，提供預設有關預防自殺的留言，亦提供可愛貓貓GIF 圖方便留言回覆，讓網民紓發情緒。他十分尊重這位推動防止自殺、建立自殺資料庫的朋友，「佢有咩 idea，即刻做、即刻幫佢做」。阿進最近學習泰文，花了數天時間就寫了學泰文 App，涵蓋學習資料，包括韻母、聲母、詞彙和測試練習等。他抱著做研究心態寫 App，「有時幫吓人，有時幫吓自己。」

阿進身兼多職卻從容自若，「時間分配都係老套嘢，每日規律作息，準時瞓準時醒，適量運動，但最幸運都係家庭和睦，家人身體都健康，有穩定工作，經濟壓力唔大之餘又無兒無女，自由自在先有時間做。」開發不同項目學到很多知識，也是一種自我成長，「不斷做，練好啲技術。有啲新人嚟到，起碼佢都知道呢個上司係識寫 code 嘅，就唔係『依牙鬆鋼』咩都唔做嘅。」

寫App中學生：幫到人係最好

當時把 hkbus.app 網頁版變成手機 App 的中五生黃進溢，現為伊利沙伯中學的應屆 DSE 考生。黃同學一直是網頁版用家，中四暑假開始自學寫程式，去年中五暑假用了數天時間完成 hkbus.app 手機 App 的 Android 和 iOS 版本。他指有關技術層面並不複雜，「主要係幫佢將網頁版擺落去 App 裏面。我覺得幫到人係最好，因為阿進整呢個 App 出嚟，佢自己都無收報酬。咁佢幫到我，我都可以幫返佢。」現年 17 歲的黃同學正考慮將來修讀計算機科學。