【市區行山】藍田出發 3小時遊五桂山 賞軍事遺跡

雖然香港疫情有所和緩，但大家都請做足防護措施，同時愛護環境，切勿胡亂棄置防疫品或垃圾於山頭。今次介紹大家行藍田後山「五桂山」，又係一個可以從商場出發，約3小時嘅行程，難度未算太高，小朋友都應該應付到。

背景：五桂山又名五鬼山

出發前想大家有心理準備，事關五桂山有唔少鬼故流傳，而其正名更係「五鬼山」，膽小朋友考慮清楚呢。清朝時當地為海盜領地，百姓不敢前往，當時已名五鬼山，更添陰森感覺。後來二次大戰，五鬼山有唔少軍事設施，更成為戰場之一，戰死士兵不計其數。近幾十年五鬼山雖然已改名為五桂山，更成為War Game場地，但同時傳出唔少鬼故，例如有人野戰時見到有個草人，於是用氣槍射擊，但後來發現該草人竟然七孔流血！另外有唔少老一輩聲稱該山頭為遊魂野鬼修道之地。2017年就發生命案，4人上山打野戰，其中一人被謀殺，更為山上添上種種疑團。

出發：商場補給

藍田本身有唔少屋村及商場都已於半山，今次行程出發地位於德田商場之後，大家可以於藍田港鐵站行上嚟，或者直接坐小巴上去亦可。於德田商場大家可以補給糧水，或者食個正餐，然後就可以出發，離開商場搵藍田公園出口，開始旅程。

衛奕信徑三段

進入藍田公園後開始上行，睇指示搵「地母元君廟」，然後就可以登上衛奕信徑三段。一開始都係樓梯級，約100米長嘅樓梯已經係今次旅程最吃力地方，樓梯整得好工整，不過都起碼要行20至30分鐘，視乎大家中途要休息幾耐而定。然後就會到達「五桂山航空導航反射器」，為一個白色超大收發站，遠遠都可以望得到，再往上走一小段就到達五桂山山頂，亦係最開揚位頂，可以望去成個將軍澳、杭口、調景嶺一帶，亦能遠眺西貢海域，如果有帶頭燈可以等睇日落，再循原路落山。

轉去睇軍事遺跡

上咗山頂，有人可以直接回程下山，亦有人可以往寶琳方向下山，不過如果有時間又有力，不妨轉去睇軍事遺跡。往東南方向走，向茅湖山一直走，沿路有唔少指示寫明往「石堡」方向就正確，大約行15分鐘就可上到茅湖山山頂，不過山頂無甚景色，大可休息一下就往「茅湖山觀測台」下山，再行10分鐘就會到「茅湖山觀測台」，又名「茅湖廢堡」，原來曾經為士兵雕堡，作為觀測台之用，為一級歷史建築，不過幾年前被封起，唔公開開放，但仍然有唔少人偷偷進入影相作廢墟遊，唔建議大家咁做，安全要緊。

一條路落山

經過石堡後，就可以繼續落山，只有一條路就可以落到底，沿過經過一棟建築，原來曾經為調景嶺警署舊址，現活化成將軍澳歷史風物資料館，此處分叉兩路，向右邊走沿引水道落山就可以到達調景嶺港鐵站；如果往左走就係靈實方向，穿過行人隧道就係尚德市區，可自行決定往將軍澳、寶琳或者坑口方向離開，完成今日旅程呢！