【幫你Plan行程】情侶啱去！3日2夜Hea遊珠海 美食+打卡全包

復活節近近地去玩，其實珠三角都係一個好選擇，特別係港珠澳大橋開通咗，嚟一個快閃3日珠海遊，食盡玩盡住盡，洗費隨時都只係去台灣或日本嘅十分之一咋！一齊睇以下行程，最適合情侶去，最緊要行程唔會太Chur，真正去放假！

Day 1

早上：金巴直達珠海

經港珠澳大橋去珠海，有幾種選擇，不過最平最快一定係直接喺港珠澳大橋口岸坐金巴，正價$65一張，比起坐其他公司喺市區開嘅巴士，隨時平一半。40分鐘就由口岸到達珠海市區。

中午：最新文青熱點「格力海岸」

珠三角發展迅速，特別係深圳嘅文青熱點多到數唔晒；但要數到珠海，最多人講嘅就係「格力海岸」，一個新發展集商業及遊樂於一身嘅地方，包括有生活館、美術館、書店、電影院、及大量文青Café同埋望住海景嘅餐廳。大陸知名社交平台「小紅書」都推介必要打咭位包括旋轉木馬、大草地、旋轉樓梯等。雖然格力海岸係偏遠咗少少，不過勝在人流都少，影相無難度！

格力海岸

前往方法：格力海岸位於香洲區，可直接搵75號巴士直達

旋轉樓梯，其中一個必影位。

包括有生活館、美術館、書店。

旋轉木馬都有，好夢幻！

書店都係文青必去打咭點。

晚上：最大商場 揚名廣場

珠海為美食之城，選擇夠晒多！其中最有特色就係香洲區嘅「揚名廣場」，同格力海岸地點夠近，玩完直接過嚟好方便！揚名廣場餐廳選擇多，仲有唔少外國品牌，例如Nike、Adidas同Muj、Uniqloi，夠多元化，可以慢慢行！推介大家食魔鍋坊，主打麻辣火鍋，喺國內都係人氣店，嗜辣嘅朋友一定要試試呀！

揚名廣場

前往方法：格力海岸乘坐75號巴士，於「唐家」站落車轉乘K3號巴士

揚名廣場位珠海最新商場之一。

基本上有一半都係港人熟悉品牌。

魔鍋坊係內地著名麻辣火鍋。

Day 2

全日：珠海長隆海洋王國

第二日可以預留全日去號稱媲美沖繩水族館嘅珠海長隆海洋樂園！館內有3.1萬立方嘅鯨鯊館加上68公尺高嘅巨型水族箱，多達15,000條海洋生物，包括鯨鲨、白鯨等等，樂園仲有唔同嘅遊樂設施、花車巡遊、煙花等，可以話係一個海洋版迪士尼樂園！

建議大家可以直接用呢個Klook套票，復活節假期出發$1,926雙人門票，仲包埋當晚入住海底房，可以望住啲魚瞓覺，呢種享受絕對難能可貴！平時正價門票一張要成$360人仔，呢個連住宿套票連埋簡單早餐，無得輸啦！

珠海長隆海洋公園

前往方法：九州港有免費大巴，另外珠海市內有好多巴士都會到達，例如K10、K11、14號等，欲知詳情可參考官網

官網：按這裡

Klook二人連住宿套票：按這裡

長隆海洋樂園為國內最大海洋主題公園。

樂園有其他遊樂設施。

晚上仲有煙花可以欣賞！

Day 3:

早上：遊翻新舊區 樂士文化區

最後一日行程要把握時間，一於去一個舊廠房改建嘅新區-樂士文化區。呢度佔地8萬平方米，被譽為珠海人度假周末最佳地點！有一眾文青必去Café，亦有眾多舊建築畀人打卡影相，唔止多地方行，呢度仲可以參與Workshop，好似陶藝、繪畫、玻璃等，啱晒文青們！文化區人少少超好行，可以慢活享受一個早上！

樂士文化區

前往方法：長隆海洋王國坐K11號巴士可直達

樂士文化區為珠海人渡周末最佳地點。

文化區中有眾多打咭位。

Café、餐廳眾多，大家可自行發掘。

定期有唔少活動，例如啤酒節。

中午：個性小店 牛津街

臨返香港之前當然要作最後搏殺，就係Shopping！返到珠海市中心，一條名為牛津街嘅商業區，雖然唔係太長得幾十公尺，不過全街都以歐洲建築風格。街入面有一眾個性小店，例如陶瓷工藝店、家居裝飾物店、DIY文青商品小店等等。掃完貨就可以去車站上金巴返香港口岸啦。

牛津街

前往方法：於樂士文化區乘坐30號巴士至「白石」站，轉乘14號前往

牛津街雖然細，不過勝在於市中心。

牛津街一眾個性小店，作最後Shopping。

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！