年尾慳錢大法曝光！咁樣慳法隨時袋返2000蚊

香港百物騰貴，而且人工唔高，年尾有無花紅又無路捉，小市民用錢都要就住就住。有網民就開post，問問大家「一人一個見過最慳嘅人做過嘅嘢」，小小問題拋磚引玉，結果原來大家為咗慳錢可以爆發小宇宙。

年尾慳錢攻略 日常小事慳到2000蚊

屋企洗費有幾大，相信大家每日都受緊，响日常生活慳住用無可厚非。有絲打就話，自己屋企從來唔買紙巾，點解呢？原來佢地只會剪個紙盒，將報紙送嘅紙巾放入去俾全家用。宜家坊間盒裝紙巾，四盒裝、五盒裝大約係30到40蚊左右，一個月一個家庭若果買四次，就大概120蚊至160蚊，咁樣一年最多可以慳到超過1900蚊！

又有人提到，自己屋企嘅沐浴露當「用淨樽底少少」時，就會用水溝開繼續用，結果竟然可以「用足半個月」，認真犀利。普遍沐浴露嘅價錢大約又係30到40蚊(唔計特別需要，果類價錢自然貴好多)，好似佢咁樣慳埋慳埋一年隨時執唔少。又有巴打話，食完粒薄荷糖，再飲汽水，「咁就可以唔洗雪凍」汽水，認真簡單又有創意地慳電費。

返工食飯都可慳到盡 頂唔頂得順

返工食飯總有人豪食，亦有人食得「節制」。有巴打講自己去公幹時，部門主管同下屬一齊食午餐時，提出三個人只叫兩個飯食，結果巴打果個星期都頂唔順辭左職！咁樣都未算最盡，有人見過幾位同事一齊食飯，但其中一個人完全唔叫嘢食，只係「痴人地果啲嚟食」，真正慳到盡。

更誇張係有人話佢朋友，將一包維他奶分開2日飲，第二日唔記得，一放就放半年，結果勁臭！而當佢發現後更嘈左幾日，揼心口咁話「就咁無左包奶」。似乎人人都有一個慳錢大法，有巴打就「眾人皆醉我獨醒」咁講：「慳埋婆乸數有用咩？食同身體有關嘅嘢都唔可以慳。」其實節儉的確係美德，但太極端又好似辛苦咗自己同人地，應駛則駛其實無壞嘅。

來源：連登討論區、消費者委員會

相關字：

慳錢 慳錢大法 香港 人工 年尾 花紅