張立基新廣告疑扮Anson Lo 自嘲年紀大唔夠氣唔夠對方跳
近日有網上點播平台邀請簡慕華與徐㴓喬Asha以《大叔的愛》造型拍攝廣告,雖然無盧瀚霆Anson Lo、呂爵安Edan同埋王德斌呢3位劇中男主角參與,但就搵嚟張立基拍攝。張立基先喺廣告中指最近有好多人同佢講佢好似一個人,之後就跳咗幾下MIRROR《IGNITED》同埋自己嘅首本名曲《Electric girl》;仲對簡慕華講:「你呢位朋友係而家當紅嘅偶像,我係以前嘅未來偶像。」疑似指自己扮緊Anson Lo。
張立基亦向媒體承認,由於自己被指同Anson Lo似樣,廣告商係有叫佢扮少少,而佢自己就覺得拍攝效果幾有趣,係無影響Anson Lo形象之下又可以製造話題,所以都無諗太多就接咗,希望Anson Lo嘅粉絲唔會太抗拒。張立基畀網民話過佢似Anson Lo後,都曾經向媒體直言早喺Anson Lo參與《全民造星》時已經有人講過佢哋似樣,甚至有網民將佢後生嘅相同Anson Lo合拼作對比,所以都特別留意多咗對方,大讚對方跳舞跳得好好,相比自己年紀大又唔夠氣,即使自己曾經係唱跳歌手都唔夠Anson Lo嚟。
喺網上討論區中,網民就有唔同意見,有網民認同張立基同Anson Lo都真係有啲似樣,亦有網民直言唔似,仲話Anson Lo三七面有啲似梁朝偉。而今次廣告亦令網民勾起對張立基嘅回憶,喺討論區留言大讚張立基當年嘅表現,指好中意佢當年首《盼你此刻奔向我》、《你好嗎》,仲覺得張立基跳舞好有爆炸力。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!