【張耀揚以外】《古惑仔》人馬淡出娛圈後 佢做咗上市公司CEO

網民發現以《古惑仔》烏鴉一角深入民心嘅張耀揚，最近以一頭白髮造型現身內地活動，被盛讚更有男人味！畢竟張耀揚都已經57歲，就快「登六」，變成銀髮族都無可厚非。而且《古惑仔》電影系列上映距今都有至少20年，除咗鄭伊健、陳小春、謝天華、林曉峰同錢嘉樂仲活躍於幕前，唔少戲中演員都淡出娛圈，各有發展。

黎珈而<黎姿>（細細粒）

飾演陳浩南深愛嘅細細粒，可算係黎姿(Gigi)嘅代表作之一。拍完一系列《古惑仔》之後，黎姿重返TVB，2004年憑《金枝慾孳》玉瑩一角榮登視后。2007年黎姿胞弟黎嬰遇車禍重傷，黎姿以照顧弟弟為由宣布退出幕前。2009年Gigi與商人馬廷強結婚，並於2010年誕下孖女，2012年再誕下細女。而黎姿接手黎嬰醫美生意後，2017年將公司安排上市，黎姿以黎珈而之名成為行政總裁及集團主席。

陳秀茹（可恩）

《古惑仔之人在江湖》入面，山雞女友可恩被人落藥結果同浩南發生關係。呢個角色由亞姐出身嘅陳秀茹飾演。身型嬌小嘅陳秀茹除咗身材好之外，一片朱唇亦都非常亮眼，結果過檔TVB之後真係搵佢拍《娛樂反斗星》扮演山寨舒淇。陳秀茹婚後嫁到美國，後來與丈夫離婚，又發現自己患乳癌及皮膚癌，好在及時治療大步檻過。

朱永棠（巢皮 ／ 蕉皮）

浩南幾位洪興兄弟之中較少人認識嘅一位。朱永棠(Jason)同陳小春（山雞）及謝天華（大天二）本身係男團風火海成員，Jason其實係最靚仔嗰個。朱永棠嘅角色喺《古惑仔》第一集就俾人打死，其後集數以「蕉皮」一角回歸。朱永棠阿哥係張柏芝第一代經理人朱永龍，Jason亦都有幫過姨仔譚凱琪擔任經理人。朱永棠現時主力打理生意，亦會北上出活動同拍劇，外表keep得幾好。

吳志雄（大佬B）

志雄哥喺第一集《古惑仔》演帶浩南眾人出身嘅大佬B，到第三集就變成浩南等人死對頭笑面虎。志雄哥因為《古惑仔》而廣為觀眾認識，名利雙收後卻因為投資失利而要重頭開始，靠北上登台搵食，10年間唱過700場show，相當和味！之後轉營從商，生意由飲食到地產都有份。

黎淑賢（方婷）

同陳秀茹同一屆（1995年）亞姐出身，當年佳麗實力強勁，冠軍係楊恭如，黎淑賢係亞軍；黎淑賢喺《古惑仔之隻手遮天》演蔣天生女友方婷，戲中慘被東星雙虎蹂躪。1998年黎淑賢同盧惠光結婚並且生咗2個仔，2006年二人離婚，黎淑賢之後改嫁醫生許智政，再生多2個仔。

尹揚明（韓賓）

《古惑仔》系列其中一條副線係洪興十三妹（吳君如），而喺第4集《戰無不勝》入面尹揚明演嘅韓賓同十三妹現身過幾場戲。本身做過夜場保安嘅尹揚明，因為身型高大被賞識介紹入行，2005年淡出轉為營商，其中一門生意係開設骨灰龕場。

林偉亮（韓龍）

韓賓細佬，戲份唔重，但係飾演嘅林偉亮本身經歷都幾傳奇。林偉亮曾經係影圈專門演壞男人角色嘅人選，身型唔錯，仲同過周海媚拍拖。之後佢鑽研佛教，2009年出家，法號「果宏釋衍偉」，曾經喺大埔慈山寺負責接待訪客，現時離港修行。衍偉法師雖然已經淡出，但係過去會帶同慈山寺籃球隊，聯同圈中藝人到學校打波弘法。