愛回家｜周嘉洛驚喜現身劇迷勁興奮 劇情疑想藝人謹記得獎後勿忘本

周嘉洛憑TVB處境劇《愛·回家之開心速遞》廢青「金城安」一角成功入屋，喺《萬千星輝頒獎典禮2019》中更奪得「最佳男配角」獎項。之後，周嘉洛暫別《愛·回家》，擔任古裝喜劇《痞子殿下》「升呢」男一及參與其他劇集拍攝工作，並喺《萬千星輝頒獎典禮2022》奪得「最受歡迎電視男角色」及與陳瀅、JW王灝兒、朱敏瀚、張穎康獲得「最受歡迎電視拍檔」，明顯備受公司力捧上位。「回家無期」嘅周嘉洛喺噚晚（3日）播出嗰一集驚喜現身，令唔少劇迷及粉絲感到欣喜若狂。

噚晚播出嘅第1913集就講到Terry（李偉健飾）以為自己亂改劇集得罪咗熊尚善（滕麗名飾），潮生（袁文傑飾）解釋話因劇情另熊尚善諗起「不孝子」；金城安喺吳旺達發展順利更勇奪「我最喜愛官員」獎，不過佢喺講得獎感受時只多謝同事及單立文：「一定要多謝我嘅同事敏瀚、灝兒同埋阿瑩，如果冇佢哋嘅話，我無可能企喺呢個台上面，所以多謝你哋！另外，我好想多謝一個喺我生命入面佔一個好重要位置嘅人，如果冇佢嘅話就唔會有我，多謝你，單立文。單立文你喺我人生入面真係佔一個好重要嘅席位，你就好似我嘅夥伴、我嘅老師、我嘅貴人一樣......我愛你，單立文」，周嘉洛疑似借劇情訴真情。

雖然佢多謝咗好多人，不過就冇多謝佢媽媽熊尚善，搞到佢嬲到喊同一肚氣。為咗可以令熊尚善消除怒氣，潮生就諗咗個辦法，就係金城安再次得獎。今次安仔奪得「傑出青年獎」，而佢喺台上只係多謝媽媽：「喺呢度我淨係想多謝一個人，就係我媽咪熊尚善，媽咪冇你就冇我，無論我喺吳旺達發展得幾咁好，完全係靠你嘅栽培，係靠你一個人含辛茹苦咁養大我，我先至有今日，所以媽咪，我愛你。」之後仲向鏡頭俾飛吻，成功氹返媽媽。去到劇情尾聲仲講到安仔與潮生嘅視像通話，除咗暗示自己「回家無期」之外，同埋潮生講到無論去邊度發展，做人都唔應該忘本，唔可以唔記得自己嘅出身。

呢一集出街後，唔少劇迷對周嘉洛驚喜現身都表現得非常興奮，及大讚劇情有意思，紛紛留言：「金城安的出現不單是這集的亮點，更令人驚喜萬分。久違金城安那非常獨特的演繹。雖然周嘉洛忙於拍攝其他劇集，希望他仍能間中在愛。回家出現，畢竟他永遠也是洪（熊）家的成員。」、「好有意思！即使出邊發展得唔錯！都唔會忘記多謝愛回家所有人」、「金城安太正啦 善姐真係演得好好 單立文問單立文係乜水 好好笑」、「今集編劇們又神了！ 既爆笑又感動！」、「好開心又意外,見到金城安出現愛回家,可以多的番來客串就好啦」、「好掛住金城安」、「好有意思！即使出邊發展得唔錯！都唔會忘記多謝愛回家所有人」、「廢青安先係愛回家靈魂」及「安仔出嚟嗰幾幕令成齣劇生猛返晒」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！