【愛情】聖誕燈飾自拍絕技

聖誕當然要睇燈飾、睇燈飾緊係要影相、影相緊係要影自己，如果唔係，上facebook download人哋啲相都得啦，駛鬼親自去咩。

即使你有無數咁多自拍經驗，遇到「聖誕燈飾」都難免會覺得…有啲難攪。人又多、燈又多、又容易背光，影得唔靚事小，影得唔靚而無相upload事大丫嘛！不過唔駛慌，記住以下幾個貼士，保證你啲相靚到自己都驚。

1. 守株待兔
影相當然要搵個靚景，靚景就自然人多，無時間同耐性點得呢？今年海港城歐洲列車同埋IFC個「JINGLE BAO」又閃又靚，唯一缺點就係人太多有排等。但呢個小問題又點會難倒美貌、智慧與耐性兼備嘅你呢？一於帶埋飯盒同櫈仔同啲遊客鬥長命，一定有機會俾你影到張靚相嘅！（不過記住mark低商場熄燈時間）

2. 迴光返照
45度角嘅光源側面盡量高抄呢啲基本功夫，你自己都純熟到可以出書當然唔駛我教。但影聖誕燈飾，開閃燈D燈飾就唔靚、唔開又暗到睇唔到你，點算呢？除咗用部相機/手機嘅HDR模式減低光源高低反差之外，你亦可以搵一個面前有適量光源嘅地方自拍。萬一真係無，試吓搵張紙巾包住個閃光燈先影啦，啲光 soft好多㗎。

3. 自拍神棍
除非你隻手有姚明隻腳咁長，否則自拍出嚟嘅相難免有三份二俾你塊面霸咗，燈飾幾靚都無用。拎住枝自拍神棍除咗可以增加距離幫你突出主體（即係你）之外，真正嘅作用係幫你掃低旁邊影響你照片構圖嘅人，影相前最好拎住技棍自轉一圈，保證你唔會俾人photobomb。

圖片來源：
flickr: https://www.flickr.com/photos/mrmorodo/8304716111