《愛情談的是感覺,不是條件》
![](https://s.yimg.com/ny/api/res/1.2/qGxHr7msLNVo6uSECxeG.A--/YXBwaWQ9aGlnaGxhbmRlcjt3PTk2MDtoPTQ3MA--/https://66.media.tumblr.com/aa47f03a845f5946218f2b485b5c1384/tumblr_inline_ohcesy22Lp1uz17q6_1280.jpg)
單身嘅時候,我哋總係有好多擇偶條件,成日幻想住下一個伴侶有啲咩優點。男就最好就係高富帥,女就身材好又靚女等等⋯⋯先唔討論呢啲條件優秀嘅人會唔會揀你,不如先諗下呢啲人係咪真係適合自己。你想嫁入豪門,都要諗下自己有無做少奶嘅能力。你想搵個樣靚身材正嘅,你又有無信心可以抵抗得到其他人搶住幫你帶上嘅綠帽。
我唔否認呢個世界真係有種男人會因為一個女人身材好而愛上佢,或者一個女人因為男人有錢而愛上,但呢種只係談條件,由金錢由外表來換愛情,唔係談戀愛,戀愛本來就係種跟條件無關嘅一種單純感覺。
所有外在條件都有崩壞嘅可能,所以到最後能維持愛情嘅唔係條件,係嗰個人本身。你或者會因為外在條件而對一個人產生興趣,但最後能令你甘心愛上嘅,都係嗰個人本身。我哋都係充滿缺點、殘缺不堪嘅人,我哋需要嘅係一個可以同你拼湊成一塊,填充你不足嘅人。愛情,本來就唔係揀一份工咁理智嘅課題,當你真正遇到一個適合自己嘅人,你就唔會再介意佢嘅頭髮愈甩愈少,肚腩愈來愈大,又或者窮你都會義無反顧拖起對方嘅手。