《愛情談的是感覺，不是條件》

單身嘅時候，我哋總係有好多擇偶條件，成日幻想住下一個伴侶有啲咩優點。男就最好就係高富帥，女就身材好又靚女等等⋯⋯先唔討論呢啲條件優秀嘅人會唔會揀你，不如先諗下呢啲人係咪真係適合自己。你想嫁入豪門，都要諗下自己有無做少奶嘅能力。你想搵個樣靚身材正嘅，你又有無信心可以抵抗得到其他人搶住幫你帶上嘅綠帽。

我唔否認呢個世界真係有種男人會因為一個女人身材好而愛上佢，或者一個女人因為男人有錢而愛上，但呢種只係談條件，由金錢由外表來換愛情，唔係談戀愛，戀愛本來就係種跟條件無關嘅一種單純感覺。

所有外在條件都有崩壞嘅可能，所以到最後能維持愛情嘅唔係條件，係嗰個人本身。你或者會因為外在條件而對一個人產生興趣，但最後能令你甘心愛上嘅，都係嗰個人本身。我哋都係充滿缺點、殘缺不堪嘅人，我哋需要嘅係一個可以同你拼湊成一塊，填充你不足嘅人。愛情，本來就唔係揀一份工咁理智嘅課題，當你真正遇到一個適合自己嘅人，你就唔會再介意佢嘅頭髮愈甩愈少，肚腩愈來愈大，又或者窮你都會義無反顧拖起對方嘅手。