憑《開心速遞》垃圾清一角成功入屋 周梓盈宣布離開無綫

無綫處境劇《愛‧回家之開心速遞》口碑及收視都不俗，劇集除咗令唔少劇中主角人氣急升之外，唔少配角都成功入屋，當中包括飾演過大小姐秘書「垃圾清」嘅周梓盈。正當大家期待緊佢同Terry（李偉健飾）有冇機會可以成為CP嘅時候，周梓盈早兩日（12月31日）喺社交網站宣布離開效力7年嘅無綫，佢話合約嘅問題而離開，內心充滿不捨。佢話離開或者留低都唔係佢個人可以決定，不過都好多謝公司嘅栽培同機會。回復自由身之後，佢會休息一陣，然後再好好諗下未來動向。佢話如果有新方向就會同大家分享。最後仲話希望大家繼續支持《愛‧回家》，同埋期待阿清將來再同大家見面。

「𡃁模組合」Donut出道嘅周梓盈，由於外貌同萬綺雯有幾分相似，所以一直被指係年輕版萬綺雯。加入無綫7年嘅佢，雖然有唔少演出機會，不過都係飾演一啲唔起眼嘅配角，所以一直未能獲得觀眾注意。直至謝芷倫離開《愛‧回家之開心速遞》劇組後，周梓盈飾演嘅垃圾清就成為大小姐（林淑敏飾）嘅新秘書。垃圾清係一個單純嘅低調有錢女，平時做嘢懵懵地又唔夠醒目，係「破壞王」之一，激到大小姐成日鬧爆佢。雖然佢嘅戲份唔算多，不過就成功入屋，仲獲得網民愛戴。

佢嘅離巢消息一出，除咗唔少網民都表示唔捨得及叫佢加油之外，劇集演員都有留言，好似林淑敏「休息，再行更遠嘅路！」、李偉健「要一路順風」及許家傑「一定有機會再合作 新年快樂」。