我想睇套戲/劇啫，點解都要禁播的5套電影/劇集

近日有傳《自殺特攻：超能暴隊》（Suicide Squad）被內地禁播，皆因「自殺」呢個concept太負面，入面又捧到班壞人好似英雄咁，並唔符合內地惡有惡報嘅準則。呢套戲內地會唔會上到映就仲未知，但係內地影視審查準則一向好飄忽，成日玩搬龍門，以下就係5套被內地禁播嘅5套電影/劇集：

電影類：

《新宿事件》（2008香港電影）：揭示日本華人悲慘史

《新宿事件》事件有內地人至愛嘅成龍，無理由會被禁架？咁就錯啦，官方解釋就係因為套戲太過血腥暴力所以唔批准上映，但係如果剛去呢啲情節，成套戲就變得支離破碎，所以電影公司最後決定唔修改，亦唔再送審，所以就無得喺內地上映。

之但係睇嘢梗係唔可以睇表面，套戲根據真人真事改編，講緊90年代華人偷渡去日本新宿嘅經歷，入面有中國女人嚟到日本為生計從事性行業；有啲華人就要做日本人唔肯做嘅工作（如垃圾場），仲被人剥削人工；有偷渡華人周圍偷嘢；甚至當地華僑都唔肯幫佢哋。因此有傳套戲揭露中國人喺日本醜陋不堪一面，自己人都唔幫自己人有違正確觀念先被禁。

《少林足球》（2011年香港電影）：影響少林聲譽

當年喺全球上映，票房大收，極受歡迎嘅周星馳電影《少林足球》，偏偏就無內地封殺禁止上映，到底點解呢？睇返當年新聞，官方解釋就話因為套戲係協拍片，即係雖然套戲係主要由香港星輝公司、寰宇公司拍，但係因為有內地兩間電影公司協拍，而根據中國《 國家電影管理條例 》，只要有內地電影機構參與製作嘅戲，都要先經內地審核先可以上映。而《少林足球》係未得到審核就喺香港上咗，加上因為片名有「少林」二字，話會影響「佛教徒的宗教感情 」同 「 千年少林寺的嚴肅性」，所以禁播。

不過就有傳其實真正原因係套戲醜化中國足球，話中國打假波同貪污所以唔畀上，都話咗真嘢唔好講架啦，有啲人好小器架～

《死侍：不死現身》（2016美國電影）：反英雄

美國英雄電影一向喺全球好賣座，今次仲要係Marvel電影，應該無問題啦掛？Nonono，《死侍：不死現身》因為內容過於血腥暴力、裸露同涉及大量粗口，所以未能通過內地審核。大佬呀，粗口呢啲嘢你唔畀人睇，唔代表大家唔會知唔會學唔會講囉，掩耳盜鈴係好架咩？你驚小朋友會學壞嘅話，又唔整返個電影分級制度？真係無得救。（但都有傳因為死侍係反英雄人物，思想唔正確所以唔畀上）

不過你無幽默感唔緊要，死侍就拍返條片回敬你：「當這個世界被恐懼支配，一個男人卻始終屹立不搖，他就是死侍，分級是⋯⋯等等，你他X的看不到這部電影。」你唔畀套戲上，大把內地人翻牆睇啦。

劇集類：

點金勝手（2014年香港劇集）：鏡頭出現反共Banner

由黃宗澤、徐子珊、胡定欣主演嘅港劇《點金勝手》講香港商戰嘢，應該唔會踩親中國條尾架？So sorry，據講係因為套劇第17集有一幕唔覺意將法輪功同反共Banner攝咗入鏡，於是自該集起就被內地下令禁播，自TVB其後上載嘅第17集網上版，相關鏡頭都被刪去。今次咁唔小心呀？都叫你拍嗰陣小心啲，唔好亂影嘢，Check嗰陣Check真啲架啦，宜家搞到人哋唔高興啦。慘啦啱啱又出現「68914｣，明玩嘢呀。

《宮鎖連城》（2014年內地劇集）：抄襲瓊瑤

呢次就真係有正當理由禁播啦，呢套2014年內地劇集《宮鎖連城》劇情梗要喺網上曝光無耐，就被人話抄襲瓊瑤小說《梅花烙》。瓊瑤其後喺「花非花霧非霧官方微博」 發表畀廣電總局嘅公開信，舉報于正編寫嘅電視劇《宮鎖連城》抄襲佢作品《梅花烙》，不久更訴諸法律行動，提告該電視劇侵犯版權最終北京市高級人民法院終審裁定瓊瑤勝訴，于正被判公開道歉，《宮鎖連城》亦需停止發行傳播，五個出品公司被告合共要賠500萬。

其實內地劇成日都抄襲架啦，廣電局幾時有理過侵犯知識版權嘅嘢？不過今次竟然膽敢連知名作家、有「文藝劇教母」之嘅稱瓊瑤都夠膽死抄，簡直係「老虎頭上釘虱乸」。其實人哋瓊瑤本身都無打算告你，說過只要喺片尾加返句「本劇部分情節，取材自《梅花烙》，謹向瓊瑤致歉，或致謝」就唔追究，點知湖南台睬都唔睬照播，咁唔要面先要告佢。

圖片來源：《自殺特攻：超能暴隊》海報、《新宿事件》海報、《少林足球》海報、《死侍：不死現身》海報、TVB.com、《宮鎖連城》海報