【戰神傳說】R35 GT-R之最終轉身

我哋叫日產GT-R做「戰神」，係因為佢喺90年代嘅澳門賽車贏過寶馬Ben屎，那些年戰無不勝幾鬼威水。自此外國都好敬畏呢架日本國寶級跑車，仲叫佢做哥斯拉，因為呢隻怪獸真係好勁，就以今代R35為例，9年前仲係試車階段，已經喺紐布靈快過911 Turbo；即使9年後嘅今日，R35已經步入尾期，但喺啱啱過咗嘅紐約車展，發表咗相信係「R35之最後facelift版」，其氣勢依然強勁，仍然係洗版之作。

2017戰神GT-R由日産商品企劃部總監田村宏志喺紐約車展揭幕。

R35用嘅係3.8 Twin Turbo V6引擎（VR38DETT），自從2007年推出至今，幾乎每兩年都有update，0-100km/h加速時間愈嚟愈快，由最初嘅3.6秒，經過第一次update之後3.3秒，再update縮減到2.8秒，再再update又快多0.1秒。舊年，GT-R出咗600匹嘅Nismo版，改用GT3級別嘅Turbo系統，馬力比原本550匹多成50匹，扭力加大到650Nm，車重減少20-30kg，如果唔講係咩車，齋睇呢套規格，其實已經同歐洲超跑差唔多。

新款20吋鈴，麻麻地襯，都係換Rays啦。

車頭兩邊加開垂直入風口，全車又加裝裙腳包圍。

橙色皮櫳你點睇？豪華過以前但冇乜跑味。

車尾包圍同Nismo九成相似，幾型。

不過，幾鋒利嘅刀都有生鏽嘅一日……唔係話R35已經唔夠人揮，只不過一架車連續賣咗9年都真係功成身退，係時候要推出新一代，據聞呢件事會喺2020年發生，而期間戰神地位就由呢架Model Year 2017嘅facelift版撑住：喺車展到見到全車橙色嘅新版GT-R好搶眼，外形明顯改咗好多細位，例如車頭燈加咗閃電形嘅LED燈，頭泵把兩邊多咗個垂直嘅入風口，翹起嘅新頭唇襯埋全車裙腳，換埋個V形鬼面罩，外形幾有新鮮感，仲配套20吋鈴，據聞係新款嚟嘅……不過買R35嘅人九成九會換鈴，所以呢樣改動都可有可無，反而車尾就直接借用Nismo版設計，睇落型好多。

同場展示咗歴代戰神，包括田村氏主理嘅BNR34。

嗱，Nismo還Nismo，2017年版嘅馬力就肯定冇600匹，因為副3.8 V6 Twin Turbo基本上冇乜改動（咁梗係唔會俾GT3級Turbo你咁好死啦，唔係整架Nismo出嚟把鬼咩），馬力係咁二加到565匹，但值得留意係650Nm嘅扭力，同Nismo版一樣，冇換Turbo點樣煉成？廠話靠重新調校點火時間同兩個Turbo，另外仲要配合埋傳動系統，即係連波箱都有重新調校過，轉波比以前順啲同靜啲。而為咗令戰神更貼地適合日用，新版仲加入咗Active Noise Cancellation系統，同埋用啲隔音好啲嘅車廂物料同玻璃，車廂會寧靜過以前。不過，呢隻哥斯拉嗌得咁好聽，呢啲改動冇好過有啦，反正買得佢又係會改尾喉……

另一架田村作品BCNR33，不過呢代唔太受車迷歡迎。

第二代KPGC110，當年推岀撞啱石油危機影響銷情。

新版GT-R有幾樣嘢要留意：第一係車廂搞到好鬼豪華，又橙色皮櫳又皮軚環，如果諗住買真係勸你唔好剔呢個option，成架車冇晒跑味；第二係中控台換咗個8吋彩芒，用嚟顯示唔同駕駛模式，係清楚好多嘅，不過搞到成個中控台好老土，原來今次改版係由設計R34 GT-R嘅田村宏志主理，可能想保留啲signature啦；最後就係日產學咗AMG，喺引擎艙加個銘牌，為砌引擎嘅工程師留名。唔講唔知，原來GT-R呢副VR38DETT只有6個工程師有資格砌，而且每人用人手砌一副，唔係齋嵌咁簡單喎，仲要用手同耳仔去感受副偈嘅運作，製作咁認真，抵俾個佢留名嘅……咁第日副偈有咩頭暈身㷫，你知搵邊個啦！