雅虎香港新聞 必試主題下午茶/Croffle配雪糕 人氣蛋糕網店進駐觀塘開打卡Cafe
炎炎夏日想同好友搵個地方嘆個Tea，可以留意觀塘呢間新店，係一間主打韓式唧花蛋糕嘅網店開設嘅Cafe。佢哋每季都會推出唔同主題嘅時令下午茶，今年夏天就係高知縣柚子！另外亦有唔同口味嘅Croffle配自家製雪糕、鬆餅、巴斯克蛋糕等。裝修以粉紅色為主，有鞦韆可以打卡，更係寵物友善、可以帶毛孩一齊Chill呀。
繁花餅房由Instagram網店開始，以精緻嘅韓式唧花蛋糕起家，最近終於係觀塘開咗實體店。Cafe佔地約2,000平方呎，近門口就有幅粉紅色嘅蛋糕打卡牆，上面係可以訂購嘅蛋糕大細同款式。另一邊就係鞦韆打卡位同蛋糕櫃。
每日限量20份！時令主題下午茶
店主Yuki表示每季都會有唔同主題，而家嘅高知縣空運柚子下午茶將會供應至9月，之後約三個月轉一次。因為鹹點同甜品都係手工製作，每日限定20份，想試嘅話記得預訂啊。三層架建議先食頂層嘅鹹點、之後到中間比較Light嘅甜品，到最底係柚子味最濃嘅甜品同鬆餅。
柚子帶子刺身飯糰用咗新鮮帶子，以柚子皮同柚子醋帶出帶子鮮味。吞拿魚牛油果他他配搭日本米餅，易啲拎上手食亦增加口感層次。雞軟骨三文治用九州雞脂肪較少嘅雞胸部位，柔滑肉泥中有軟骨粒粒爽脆口感好過癮。
柚子乳酪慕斯杯上面嘅柚子啫喱同乳酪都係酸酸甜甜咁好清爽，加上鬆脆嘅燕麥粒粒甜而不膩。柚子巴斯克芝士蛋糕用咗柚子皮同柚子汁製作，食落比一般芝士蛋糕輕盈綿滑。
為咗點題，經典英式鬆餅亦加入柚子皮，再配搭檸檬皮、蔓越莓，食落外脆內軟之餘，又有柑橘酸香平衡膩感。柚子撻係咁多款茶點當中柚子味最濃郁嘅，手工曲奇餅底非常鬆脆，加上軟滑柚子餡同金箔點綴，食完為成個Tea Set畫下完滿句號。
唔夠喉嘅話，鬆餅亦可以單點，Size會比Tea Set裡面嘅大啲。因為係即叫即焗，雖然要等約10分鐘，但新鮮出爐口感特別外脆內軟，濕潤度亦啱啱好，就算唔加果醬都唔會太乾。
牛角窩夫配自家低糖雪糕
近年大熱嘅Croffle，即係用牛角包麵團熱壓成格仔窩夫，口感特別酥脆亦有牛油香。配料有三款選擇，最加分嘅係配搭自家製雲呢拿雪糕，配Croffle形成冷熱交織口感，而且係用無生雞蛋嘅低糖配方製作而成嘅，罪惡感都少啲。
創意口味蛋糕+三文治
巴斯克蛋糕選用日本北海道忌廉芝士製作，口味更會按時令更換，例如有原味、綠茶，同拍攝嘅呢款烏龍茶，茶香清幽，口感幼滑。而紐約芝士蛋糕就加上藍莓乳酪、士多啤梨、紅桑子、藍莓，莓果酸味同芝士香好夾。
焦糖布甸用高腳玻璃杯上枱，口感軟滑Q彈，焦糖嘅甜中帶少少焦香，配搭忌廉同士多啤梨。
甜品之外亦有單點嘅鹹食，三文治名副其實非常豐盛、有爆餡效果，餡料選擇有低脂嘅雞胸肉、吞拿魚口味，亦有創新嘅紫薯肉鬆口味。
本地烘焙咖啡+打卡漂浮特飲
飲品亦見心思，手沖咖啡有本地小店烘焙嘅藍山咖啡（$48）。而呢杯焦糖咖啡牛奶就用咗有熱帶花果韻同焦糖香氣嘅東帝汶咖啡，酸度較高配搭焦糖得以平衡。另一杯士多啤梨牛奶呈粉紅色，酸酸甜甜。
純手工牡丹花蛋黃月餅
小店以精緻韓式唧花蛋糕起家，月餅亦以韓式裱花技術製作，人手唧出每塊花瓣，栩栩如生而且獨一無二。外層係無油韓國荳蓉、日本製白荳粉，而裡面係原隻漏油蛋黃。Yuki表示由於牡丹花造型實在太複雜，唔單止今年發售數量有限，而且好有可能係最後一年出售！想試嘅話記得趁而家有早鳥價嘅時候入手啦。
地址：觀塘觀塘道436-484號官塘工業中心3期8樓B號舖
文、相：Cathy.H
