打緊份無興趣嘅工？美研究：40歲以後會後悔 甚至影響身心

雖然人人都話夢想唔可以當飯食，都係腳踏實地搵返份普普通通嘅文員工，或者去考政府工啦，但係呢啲工都唔係你想做嘅，對份工無熱誠，咁做嚟真係有意思？我知架，你一定又係講有份長糧呀嗎⋯⋯

不過，有長糧但享受唔到咁又點先？美國The Ohio State University就發表咗個長期性研究，由1979年開始追蹤當時14-22歲嘅6,432人，當佢哋到25-39歲再請佢哋為自己嘅工作滿意度評分，1分代表非常討厭自己份工，4分就代表好鍾意。

而當中發現有45%咁耐以嚟都好憎自己份工，23%就由原本鍾意但慢慢唔滿意份工，只有15%受訪者一直好滿意份工，亦只有17%人做做吓慢慢鍾意份工。當中亦發現如果自後生開始就一直唔鍾意自己份工嘅人，身心狀況都好差，因為長期有好大壓力，而且又訓得唔好，隨時引致唔同健康問題。

梗係啦，本身已經對份工無咩興趣，就無得發揮所長，無咩成就感，之後又有個惡頂上司，成日XYZ你，返工返到行屍走肉咁，仲點可以日日朝氣勃勃咁做嘢？

我知好多人一定話邊有工可以又鍾意又有返咁上下人工，但係如果要我呢世都打份我唔愛嘅工，咁其實我已經唔係過緊人生，我只係生存緊⋯⋯

揀工，要慎選呀！