拍拖10年冇嫁期 泳兒男友太Cool：佢未求過婚

泳兒入行16年，歌唱路走過高山低谷，在最低潮時曾諗過轉行，不過自放手一搏走暗黑路線後，讓她重拾自信及學識隨緣。至於拍拖逾10年的髮型師尚未求婚，她就覺得現跟已婚沒分別。

英皇歌手泳兒剛出道時，曾被視為師姐容祖兒接班人，備受力捧，日前她在專訪中，談及等足9年才再推出全新大碟《Dark Light Of The Soul》的感受，她豁達謂：「以前1年要出兩張大碟，唱成20首歌，覺得好飽，唔夠時間消化。」自認愛慢工出細貨，近年習慣1個月才錄好1首歌：「因為我要抖吓，畀時間自己諗吓點樣先唱得最好、最中。」

無意做會計師

她坦言曾因壓力大而失聲，萌起轉行之意，試過和朋友合資搞首飾生意，又學過寵物美容，不過就沒想過學以致用：「我喺新加坡係讀會計，完成埋半年實習，不過我坐唔定，所以會計師呢份工唔太啱我，但又唔會話一定唔做會計師。」問可考慮專心做人妻？她則說：「同男友感情穩定，但佢好cool，未同我求過婚，都過咗我最想結婚嘅時期，所以唔太心急，況且依家都同男友住，同結咗婚冇乜分別。」

內地工作延期

對於新一年，泳兒望有新嘗試如拍劇及電影，恨做反派角色，她說：「我拍過咁多MV，又讀過演藝班，啲戲都唔差嘅。」又指原本接了內地工作，但受疫情影響而延期，問可覺得可惜？她覺得是天意：「因為內地嘅工作同出碟期撞咗，我諗過唔喺香港宣傳都照出碟，但又諗係咪唔夠誠意，對唔住我嘅團隊？依家唔使返內地，可以專心做宣傳，只係嚟緊有其他工作，或者又接唔番嗰個內地Job。」