搞完最後一屆 ViuTV再選口罩小姐變「尾二一屆」

舊年ViuTV食住疫情搞選美真人騷《最後一屆口罩小姐選舉》，本來以為疫情會緩和大家可以除罩相見，所以先叫最後一屆，點知迎來第5波疫潮日日幾萬宗確診。今日ViuTV就喺Facebook出宣傳片，招募靚女參加新一屆口罩小姐。

既然上年已經搞咗「最後一屆」，咁今年個名叫咩好？索性係《尾二一屆口罩小姐選舉》。

宣傳片由上年3位導師、ERROR嘅保錡、193同Dee演出，另一位ERROR成員肥仔只係聲音演出。當然仲有最後一屆口罩小姐冠軍浩南（鄭伊琪）、殿軍肥腰（米露迪）同「除罩最靚獎」得主三小辣Giann(羅佩芝）。

上年口罩小姐決賽當晚，TVB推出大堆頭綜藝節目《開心大綜藝》迎戰，當時上任大台副總經理不久、專責綜藝改革嘅曾志偉，見記者時表示2個節目難以比較，因為ViuTV收視只可以同J2相比。而ERROR嘅193回應時明寸曾志偉，認為「佢哋係啲老嘢睇㗎嘛」、「收視點嗰幾百部電視機我哋不嬲都唔介意」，網民十分受落。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！