《放手同放棄係兩回事》

失戀或單戀嘅人好多時都會話：「我唔想放棄呀⋯⋯」，因為佢哋內心深處其實存有一絲絲希望，覺得有日會感動上蒼，得到一個被愛嘅機會。不過，佢地成日將「放棄」同「放手」混淆，放棄係將屬於自己嘅嘢拋棄，而放手係唔再苦苦捉住唔屬於自己嘅東西。

放棄係有啲可惜嘅存在，因為你要放開嗰份你原本可以擁有嘅愛情。你選擇同拍緊拖嘅另一半分手，咁係放棄。但如果你離開一段苦苦糾纏嘅單戀，或者一段根本唔適合嘅感情，咁樣係叫放手。而我哋通常最苦惱嘅係處於一段根本沒無希望嘅感情，而唔捨得放手。

有朋友同另一半拍拖十年，但大家早已無咗激情，只係當對方家人嘅存在。一個想結婚，另一個唔想，兩個人分歧其實好大，但係又唔捨得分手。朋友話十年感情好珍貴，唔捨得放棄。但其實，糾纏喺呢個無咗快樂嘅困局入面，雙方都好痛苦，既然唔適合，不如放手。唔再苦苦捉住，雙方重新得到自由，先係最好結局。

我哋成日都好怕放手，不停安慰自己再試一下，再努力啲可能會得到好結局。但明明已經試過好多次，唔work就係唔work，繼續等一個唔知幾時會出現嘅奇蹟，只係浪費青春。與其相信奇蹟有日會出現，不如相信自己離開咗會找到另一種快樂。愛情無聖誕老人，唔屬於你嘅野，唔會有日瞓醒就出現眼前，所以算數啦，放開綁住自己雙腳嘅重擔。放手，你就自由。