新何太想為何伯添丁 發表愛的宣言「必定一生相隨」婉拒同林作開班後轉頭問分帳？

因為喺《東張西望》自爆家事嘅何伯同新何太，早前成為城中熱話，令新何太本身經營嘅抖音帳戶一夕爆紅，而家已經有1萬3千名fans支持。

新何太似乎相當受落網紅身份，除咗更落力拍片教姊妹們人生道理，更不時留言回應fans問題。有網民問新何太會唔會為何伯添丁，何太回應話「我也希望懷上」、「順其自然」，似乎何伯老來得子並非天方夜譚！BB一出世就有5個做得佢爹地媽咪嘅阿哥家姐，真係5倍幸福。

有人問何伯被細女提走嘅450萬點算，新何太就話「錢是我老公的，一定要挪（攞）返屬於自己的錢」、「老公講拼了老命都要挪（攞）返來」。亦有網民擺明挑機問「如果何伯當初無錢，你會唔會揀佢」，新何太就大爆愛的宣言話「佢對我付出過，我必定一生相隨」。被問到點解唔揀李龍基，新何太答得好霸氣「我也看不上他呀，跟我沒感情基礎的人，就算佢有一個億，我也不會瞄他一眼」。

新何太人氣急升，佢計劃下星期三下晝一點同何伯齊齊開直播，更自爆有公司開10萬蚊出場費邀請合作，甚至搵米芝蓮大廚同佢一齊教煲湯。而向來識抽水嘅林作就話願意出10萬蚊同何太合作教人煲湯同處理資產，更抵死係課程費用為450蚊，目標招收1萬人，正好要為何伯搵返失去嘅450萬元！何太回覆網民留言時話「不了」，但林作出post聲稱何太私信佢，仲問分帳如何。唔知何太話「有公司開10萬蚊出場費邀請合作」嘅，係咪講緊林作？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！