新年轉新轆 識睇尺碼冇人呃到你

新年流流，唔只人要置新裝，車都要換過兩對「新鞋」，即使你架唔係新車，換完都會成個look唔同晒。所講嘅係換一套型仔新鈴，唔好以為條鈴用鐵造就好堅固，其實都係眾多汽車消耗品其中之一。你諗下，套鈴係最貼近地面嘅零件，一路行一路捱盡飛沙走石，一個唔該掂到路壆，小則刮花，大則拗邊，你試下唔理佢囉，日子有功就會甩油生鏽，好鬼肉酸。

換鈴都算係改裝車的最基本步，換套新鈴之後架車嘅個人風格更加突出。(圖：Rays)

刮花、拗邊有冇得救？係有嘅，好多呔鈴鋪都有修理服務，可以磨番滑條邊，或者幫你打番正拗咗嘅位，仲可以成條噴過大翻新。不過，有幾樣嘢要注意番：輕微拗邊還可以修復，如果條鈴撞到變晒形，真係換過套新好過，事關未必可以做到perfect圓形，而經過火烘高溫處理之後，金屬剛性亦唔及原裝咁強，可能有危險性。另外，如果你套係鏡面或電鍍鈴，咁就唔該你小心啲用嘞，因為花咗都幾難修復，或者做到仲貴過買新。

如果用嘅係電鍍鈴就要特別小心，因為刮花咗好難救得番。(圖：SSR)

想無咁易刮花條鈴，除咗小心啲揸車之外仲有乜辦法？其實配用嘅車呔都好緊要，先講下點解讀條呔嘅尺碼數字：例如常見嘅215/45R17，215係呔面闊度，單位係毫米mm，215即係215mm；45係所謂嘅扁平率，簡單講則係有幾厚，不過就唔係用mm做單位，係百份率，215/45即係215mm嘅45%，即係96.75mm厚；最後R17係呔鈴直徑，即係啲人成日講嘅配幾多吋鈴。

想知條呔咩spec？踎低睇下呔壁上呢組數字就知道啦。

好嘞，以前就當你唔識睇，而家知道尺碼點解讀，就唔好盲中中一味聽人講，換大幾吋用18、19、20吋鈴啦喎，點解？首先第一件事，通常換大咗條鈴直徑，為咗要盡量配合車輪大細，無可避免會令車呔扁平率下降，即係話條呔會薄咗，咁條鈴邊會刮到路壆甚至路面嘅機會肯定會大增。例如好多Tesla Model S嘅車主，買車揀咗21吋鈴而家都呻笨，係就係好型好靚呀，但條呔太薄成日刮花條邊鬼咁肉赤嗰度弊呢……

要搵啱你架車嘅呔spec一啲都唔難，呢哦公開資料只要上網摷下就搵到。

改變車呔同套鈴嘅size，除咗話美唔美觀、易唔易刮花之外，仲有一個好重要考慮，就係影響車速顯示，即係個錶行緊80km/h，但換完之後實際速度可能會快咗或慢咗都唔出奇。其實而家好多新車，原廠都有提供更換唔同尺碼車呔鈴嘅指引，如果懶睇用家手冊，上網search都一定搵到。例如一架VW Golf Mk7，就有15、17、18、19甚至20吋選擇（16吋係而家唔多流行嘅size），上網搵嘅資料點先知佢信唔信得過？科技咁發達無人呃到你嘅，即管喺手機裝番個車呔換算App，再入啲尺碼資料入去，例如本來用緊205/50R17，想換大到18吋，網上搵到應該配225/40R18車呔，咁咪入晒兩套spec落去，個App會計俾你睇換前換後車速顯示只係差0.1km/h，屬可接受程度，咁就可以照換。如果計出嚟誤差太大，咁就千祈唔好換喇。

裝個手機App再輸入換前換後嘅呔spec，就可以計到換完之後車速誤差有幾多。

即使換啱size，都要留意唔同呔spec對行車會構成乜嘢影響，簡單講，厚啲嘅車呔就好似咕0臣咁，吸震力都好啲；相反車呔薄咗揸起嚟就會「躉」啲，坐得人冇咁舒服，但係路面嘅變化就會清晰咗，如果架車係攞嚟飛攞嚟劈嘅，多數都唔會介意。而呔面愈闊即係同路面接觸嘅面積愈多，掟起彎嚟都會咬地啲，咁當然都視乎條呔用到咩程度，無晒呔紋又遇上濕地，真係神仙都救你唔到。總結一句，換呔前自己研究下先，問多啲聽多啲，當中有好多學問，亦有安全考慮，千祈唔好貪平貪方便貪過癮就亂咁換呀。