【新紮師妹Reunion】《多功能老婆》搵許紹雄做楊千嬅爸爸有埋森美黃偉文就perfect

無綫重頭劇《多功能老婆》正在開拍中，劇集演員陣容強勁，除咗搵嚟闊別無綫劇集17年嘅楊千嬅做女主角之外，仲搵咗周柏豪、黃浩然、朱晨麗、黃錦燊、洪永城、陳煒及吳若希等等。黃浩然喺劇中飾演楊千嬅老公，個名仲叫返電影《新紮師妹》嘅「劍雄」，佢哋今次再合作，就算劇集未拍完，已經令到唔少觀眾期待。近日再有參演過《新紮師妹》嘅演員加入劇組，佢就係許紹雄啦！

日前，楊千嬅喺社交網站上載自己、《多功能老婆》劇中演員與許紹雄嘅合照並留言話：「隆重介紹，熱烈歡迎，我爸爸……方中SIR 」，之後仲hashtags咗「#daddy」同埋「#一家團聚」等等。睇嚟許紹雄將會劇中飾演楊千嬅嘅爸爸，唔少網民仲好開心咁歡迎許紹雄，並留言話：「歡迎方中sir gogogo」、「方中sir呀。今次真係呀爸啦」及「太開心了！！好期待！！」等等

電影《新紮師妹》係唔少80後嘅集體回憶，電影成功創造唔少經典角色，當中包括傻大姐「方麗娟」、成日嗌Go Go Go嘅「方鍾sir」、扮男妓仲要叫方麗娟去做雞嘅「劍雄哥」及有型靚仔嘅黑社會接班人「歐海文」等等。

劇集如果搵埋黃偉文同森美客串嘅話，咁就無得輸啦！