方力申「上水」入娛圈!童星吳諾弘首戰奧運勁叻仔
曾代表香港泳隊出戰奧運嘅「飛魚王子」方力申,憑住靚仔有型外表獲得青睞,退役後由泳壇加入影壇,發展演藝事業!另一邊廂,童星出身嘅吳諾弘就好叻仔,身為香港男子花劍代表隊嘅佢,成功入選男子花劍奧運最終名單,首次出戰東京奧運!
「吳諾弘」你未必知係邊個,但睇樣就一定知,現年21歲嘅諾弘名校拔萃男書院出身,2005年參演首部劇集《心花放》,之後拍過多套大熱劇包括《巾幗梟雄》、《宮心計》、《On Call 36小時》、《巨輪》等,當中喺《巨輪》飾演蕭正楠嘅童年最為人熟識,同重量級視后李司棋有多場對手戲,表現令人印象深刻!
佢仲同過多位一線藝人合作,包括佘詩曼、鍾嘉欣、楊怡、唐詩詠、郭可盈、陶大宇等,而2015年嘅《四個女仔三個BAR》就係佢告別作,之後佢全情投入劍擊運動,雖然佢冇再拍劇,但其後再為2018年嘅《是咁的,法官閣下》擔任劍撃指導,為黃智賢及關禮傑喺終審法院外格劍戲提出意見,學以致用。
雖然佢未完成中學學業,但佢醉心劍擊,曾攞得多個獎項,更好清楚自己目標,就係參與奧運,如今終於夢想成真,實在令人佩服!雖然佢已「退隱」幕後,但曾經受訪被問將來會否再做藝人時,佢就話希望做教練,但好難講咁話!