方東昇成TVB新收視救星？ 《尋人記2》下周出街救亡

近期TVB收視出現跌勢，新劇《雙生陌生人》首周更加錄得平均13.5點直播收視，隨時成為史上最差TVB黃金時段劇集。其餘節目表現都唔太理想，煮食節目向來係收視嘅保證，但而家出緊街嘅《三餸一湯》上周都只得12點。

雖然收視下跌或者同防疫政策解除、市民重新出街娛樂有關，但總不能坐視不理。TVB近期播放嘅節目預告所見，由記者方東昇主理嘅新聞部節目《尋人記II》將於下周四出街，救亡意味十分強烈。

去年4月，曾志偉上場出任無線管理層主力改革綜藝，仲大鑼大鼓推出九大節目。《尋人記》當時係打頭陣上場，口碑同反應都比另外8個節目來得正面。十集節目跨平台收視近23點，成為年度綜藝及資訊娛樂節目第四位，只係輸俾台慶頒獎禮、港姐等大show。以成本計，絕對交足功課。而且節目係近年少數得到網民正評嘅TVB出品，重訪當年小肥仔、跟進八十年代移民潮下港人嘅故事，都備受讚賞，仲獲得「紐約電視電影節」歷史及社會紀錄片銅獎。

從預告片所見，只知道方東昇會繼續同黃曉瑩、李曉欣及黃靖婷四圍走訪，相信各個個案主人翁都曾經出現喺過去嘅《星期日檔案》或《新聞透視》。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！