日女要求老公年薪至少有30萬港元 7成日男未達標

成日話港女眼角高又拜金，所以識揀一定揀溫柔體貼又可愛嘅日本妹啦。但其實你唔好以為日本妹咁易食，佢哋眼角都唔低架。

明治安田生活福祉研究所就做咗項大型研究，搵嚟3,600個日本男女做調查，發現50%以上20-30幾歲嘅未婚女仔，希望未來老公年薪至少有400萬日圓（約港幣30萬），但係就有近7成未婚男性未能達到呢個標準，唔怪得近年日本結婚率大大下降啦。

但係其實又唔可以話日本妹要求高，點解？因為其實日本真係一個好傳統嘅父權社會，早前日本政府調查都發現得46%老公會做家務，仲只係會做十分之一嘅，你話日本妹點可以又返工又打理好所有家頭細務？

仲有，係日本師奶收入低過一定門檻，老公就可以交少啲稅，仲可以得到公司嘅家庭津貼，所以好多女性結婚就會唔做嘢，最多做低薪嘅part time，基本上生活完全要依賴老公，所以唔搵條大水喉點過日子？

咁樣一比較，其實港男真係唔錯，好多都肯做家務又錫老婆，睇下陳奕迅都成日任得老婆瘋狂買名牌啦～不過唔好再諗住娶日本妹啦，因為娶咗你就唔使旨意公一份婆一份，成頭家就係你孭起哂，不如揀番個拜得金嚟，自己又搵到錢，個人又好真嘅港女杜如風啦～