是日噏day：人性服務，居然喺IFC搵到！

首先，感動到喊就梗係誇張嘅說話技巧啦！但亦都係我喺中環IFC Palace戲院服務台，氣喘喘咁同坐係櫃檯個位小姐講嘅真實對白。

櫃檯小姐仲講笑答我：「咁又唔使喊，我冇紙巾啊。」

要講返事件經過嘅話，我必先要承認，呢件事，係我自己「智將」到裂開。

話說星期四晚想買星期六戲飛睇《蝙蝠俠對超人》，工作中好快地上HK movie個apps買左6張星期六晚10點幾嘅起飛。見到咁多位揀梗係快快㩒掣啦，套戲又3D喎，咁梗係坐後啲揀尾行冇咁暈喇。

Click入購票程序，redirect返去官網，見到最尾一排，即刻揀6個位先唔好講笑，快手入信用卡資料搞掂，跳起Yeah，繼續做野。

尾行H排6個連位，nice！cap個靚screen， 等星期六睇戲。

星期六當晚，套戲10點20分開場。去到9點50分，我心血來潮開電話望望將圖，double check有冇錯日子時間等等。唔check猶自可，一check即刻面都青埋。點解張圖個螢幕係下面嘅喂？！定一定神望多兩秒，好！已經confirm，我係傻仔幾多號了，因為……

因為•我•成功•買錯咗•第•一•行！

跟手即刻通知晒啲朋友，再即刻飛去戲院門口，睇下可唔可以退票再買過。同時上HK movie app睇，左手邊後排仲有6個分3行嘅位，再望多兩望，個表應該唔準確，因為開場前一個鐘，已經寫明唔可以再用手機買飛。由嗰一分鐘開始，我邊急步行，就邊按摩定條頸，因為坐第一行頭岳岳睇3D成兩個幾鐘喎，唔係唔打定個底下嘛？

拿拿拿！感動位黎啦！

趕到去櫃檯，22:10，膽粗粗地打算同櫃檯個位小姐提出可否調位。開口已經口窒窒，因為畢竟無人有義務去為我嘅低能行為同錯誤去負責，又或者做額外嘅嘢（我又唔係六百八十九果類number人）－真係正所謂「人地幫就人情，唔幫真係好大條道理」。

我：「唔好意思啊唔好意思啊！我上網買飛買錯左，本身想買最尾個行，但係買咗第一行。」

點知櫃檯小姐一臉從容架，非常有準備地回答：「哦，你係咪星期四買咗第1行6位嗰位先生？我哋已經喺尾2嗰行，預留咗6個位，去俾你改位。」

我果下直頭眼凸，兼下巴跌咗落地下，情不自禁咁叫咗聲：「吓？！」

可能表情太傻仔，櫃檯小姐笑笑口咁答：「哦係呀，因為我哋戲院座位編排係倒返轉睇，所以都有唔少人會好似你咁買錯飛。再加上你算係比較早買，冇理由買6個連位有得揀都買第1行架嘛，係咪？」

我嗰下意識到：係喎，天下間「智將」何其多，又點知我一人呢？

我：「唔該晒你啊！」

大概重複左呢句10次之後，就輪到嗰句我感動到想喊啦。

講呢個故仔出嚟，唔係想話比大家聽IFC Palace原來有咁嘅服務，因為我唔相信呢一個應該叫做「服務」。都係果句，下次再發生都仍然係幫就人情唔幫就道理。

反而係想講嘅，係呢間戲院嘅員工（我唔知中間涉及幾多位啦），有一份同理心，對工作上面嘅客人，係「人」去看待，而唔係公式化嘅禮貌，更加唔係單純唔做唔錯少做少錯嘅so called服務。

呢種咁人性化嘅態度，喺香港嘅服務業，已經越來越少見。行入各大商舖，聽係聽到好多「歡迎光臨」同埋「多謝晒拜拜」。但當你試下真正同佢地交談，應機講返句「唔該」又或者「拜拜」嘅時候，佢哋反而好似冇聽到你講嘢。因為佢地只不過係不斷重複公司需要佢哋講嘅客套說話，就更加莫講佢哋會企喺你嘅角度，去幫你諗多一步。

呢份温情人性，似乎往事只能回味，只係存在喺已經俾政府同地產商排除得幾乎成為過去式嘅舊式小店之中。

咁人性化嘅戲院，我居然係中環嘅一個金融商場戲院度搵到，你又叫我點樣唔感動同埋欣賞呢？

text/ Tyler Li