是日噏day：你想我似宋仲基 我又何嘗唔想你似宋慧喬呢？

我諗近來香港男士最痛恨嘅嘢，一定係99台播緊嗰套《太陽的後裔》。準確一啲去講，應該係好憎宋仲基先啱。因為呢套劇，安排咗排山倒海式嘅冧豬位，畀宋仲基表演夢幻式嘅冧女場面。

影響係咩呢咁？朋友A朋友C朋友K全部無一倖免，但係就個個都一集無睇過。

「喂！究竟套《太陽的後裔》係講咩嘅啫？我女朋友而家日日都講幾次：你可唔可以好似宋仲基咁咩咩咩啊？你唔明㗎啦，真係好冧㗎！佢真係好可愛架。」

我話：「我知我知。我睇過本半集。我知呢啲應該點樣答你哋女朋友。」

朋友們即刻雙手抱拳兼欠身：「師兄！願聞其詳！」

「因為當宋仲基靚仔到咁，基本上佢做咩都係冧豬。你試吓換用我同你個樣落去重演一次相同嘅情節？個效果即刻唔同晒啦。但係唔可以話個問題出係我同你度，你諗下，對手係宋慧喬喎！宋慧喬啊係！淨係睇樣睇身材，我喺你哋女朋友身上，完全搵唔到有邊一忽比得上。而最攞命你知唔知係咩？」

朋友C：「講你就講啦。」

「我睇咗半集，宋慧喬係醫生，有學識有愛心，又有使命感。但最攞命係，次次佢約宋仲基去啲靜嘅地方傾計，面對面嘅嗰份溫柔、恬靜，含羞答答但係又同時能夠清晰地表達自已嘅嗰份能力，已經好無敵。更難得嘅係，當宋仲基同佢講嘢嘅時候，佢聆聽時保持靜默嘅嗰份專心，同埋尊重，我係你哋啲女朋友身上，真係完全搵唔到喎。」

朋友們個樣，直情就係「I know your feeling bro.jpg」咁嘅樣。我就繼續講……

「如果畀你哋同你哋啲女朋友，喺一個明明好浪漫嘅地方靜靜地咁傾計。首先，佢要聽到你講嘢，而唔係掛住自己講嘢，本身已經有難度。仲要，個話題你諗下如果換咗係『嗰個手袋抵唔扺買；嗰條裙應該買寶藍色定還是天藍色；又或者——套韓劇某一段情節真係好好睇好冧架！宋仲基真係好可愛！』。想像下，都覺得煞風景啦，仲點講得出一句深情嘅saranghae先？係咪？知性嘅女人，先配得上有一個冧死女嘅男人嘅。」

呢個時候，幾條友墜入咗一陣相對無言惟有淚千行嘅沉默。

一向善於突破盲「腸」嘅朋友C，最先打破呢個沉重嘅氣氛：「即係應該同佢哋講，你瞓醒未呀？人地係宋慧喬啊！以你嘅quali，未夠level有個太陽的後裔男朋友啊，『生活別過份地童話化』OK？咁真實嘅對話，講出口，會死㗎，你知唔知啊？」

我話：我知啊。

朋友K問：咁你點同你女朋友講？

我：點同啫？我女朋友仲正過宋慧喬，又善解人意過佢。

朋友們：妖！
呢篇稿我女朋友都會睇架嘛，你當我傻㗎？
聽日準時返工啦

Text by Tyler Li