是日噏day：你的不安贏得你信任

首先，以下呢個故仔，係真係講緊一個愛情故事。

「我知你個心，其實根本唔係咁諗！」如果見到呢一句說話，你覺得似曾相識兼有聲，個頭開始隱隱有啲痛，相信，你應該係一位男士。

當一個人，沒情由地懷疑另一個人，可以係惡夢嘅開端。

朋友小李今年年頭娶咗個老婆，叫阿Faye，今晚係佢結婚以來，第一次出到嚟happy hour。

佢問：「記唔記得呢，之前我同過你講，阿Faye嗰陣成日一問起結唔結婚，都會發脾氣。每次我話『我真係打算娶你架。』，佢都會話：『我知你個心其實根本唔係咁諗！』記得嗎？」

梗係記得啦，但你之後搞掂左啦，你咪成個老婆除咗返屋企囉，仲好神聖莊嚴地喺婚禮宣誓，在場律師同阿Faye都冇再懷疑你唔係真心娶佢啦！

小李：「問題係，佢呢句所謂『覺得我個心唔係咁諗』，結咗婚後——特別係近呢個月——老是常出現到我不能忍受。一開頭拍拖時都係針對結婚呢樣，再盡都只係問：『你愛唔愛我？』時，我答『愛啊！』，佢會話『我覺得你個心根本唔係咁諗囉』。

但去到而家結咗年幾，例子有幾咁多，事件又有幾咁鎖碎無聊，我真係記唔晒。
例如佢買梳化問我邊款好，我答完佢我覺得佢揀嗰個款靚，佢又會覺得我純粹係唔想煩唔想揀，個心根本唔係咁諗；佢買件衫問我意見，又係咁；睇邊套戲、去邊度旅行，只要我對佢嘅提議話『OK冇問題』，佢就梗局覺得我個心其實唔係咁諗。

最爆個次係，佢問我係咪覺得佢阿爸阿媽好煩好蠢，我話唔係。但冇用架嘛，佢只要一句主觀話覺得我唔係咁諗，我就已經大禍臨頭。所以而家三日唔係兩日就嘈交，其實真係好攰。」

其實學某個電視台人稱新聞界岳不群嘅高層所講——你又唔係佢心入面嗰條蟲，你又點知佢唔係真係咁諗呢？但係我好明白，叫佢同阿Faye講道理只係嘥氣。所以我拋磚引玉問小李：「你咁唔開心，唔離婚？」

小李：「咁而家有小朋友，又一齊買咗樓，唔會諗離婚啦！其實佢唔係成日都係咁嘅，如果撞正佢心情好嗰日，例如行街買完衫，同班姊妹去完high tea，就唔會咁疑神疑鬼囉。但如果撞正嗰日佢返工返得唔開心，又或者整花咗啲gel甲，咁就大鑊架啦。其實真係睇佢心情架咋。最慘係呢期，我哋個小朋友晚晚唔肯訓，嘈到佢都冇得瞓，心情唔好，咪黎料囉。唉……孩子惹的禍……」

我心諗，其實要睇人面色心情好唔好來做人，有時真係賤過隻狗。

早知道佢會答唔離婚，所以我打蛇隨棍上再問：「哇！你咁都有得賴落去個小朋友度啊？你不如話嗰日落雨，所以你老婆心情唔好？Anyway，咁你有冇試過表達你嘅不滿，同佢講咁樣其實好辛苦？」

小李：「梗係冇啦，越反抗佢心情只會越差，到時咪又係我受，應該會惡化到連電視機睇邊個台，佢都懷疑我心入面唔係咁諗。所以我次次都係死狗咁氹番佢架咋。」

講到呢度，我覺得唔使再講落去，佢應該都係會一世俾人食住：「咁做人定做死狗嘅野，就自己揀啦！其實你老婆都幾好吖，係你個仔百厭啲啫，最多咪冇得睇電視、歡容D，一陣無飯盒你食架。」

然後我反了白，佢睥咗我一眼。

text by Tyler Li (facebook: 泰兄）

（圖片來源：renatocardoso blog）