是日噏day：推簡體字？不如糾正歐化中文先

簡體字繁體字嘅爭論，近月再次升溫，一來因為教育局提議學生要學簡體字，二來因為無線電視推出J5頻道。新聞報道嘅環節，普通話語音報導加上簡體字幕，惹來不少人反感。（unwire有文章教學，如何刪除此頻道——普通話 + 簡體字 ? 教你 3 分鐘真正移除 J5 台）

簡體字有幾唔好，繁體字對承傳優良文化有幾重要，好多人都討論過，不贅。反而想講講，如果教育局繼續想冇嘢搵嘢嚟做，應該教學生如何避免使用常常伴隨簡體字（老是常出現）嘅歐化中文，先至係真正幫助學生漢語能力嘅重要方向。

今時今日嘅中文，特別係大陸嘅中文，為咗扮野同埋掩飾詞彙貧乏，趨於歐化。作為一個當年經常走堂嘅學生，本來唔應該班門弄斧，但最後都係決定粗疏膚淺咁講一講歐化中文嘅簡單例子。

• 點解會話歐式中文詞彙貧乏呢？大家成日見到簡體字行文，會講「乜乜性」、「乜乜化」、「乜乜度」，後面跟手加「提升」、「降低」、「加強」、「減弱」等等嘅詞語，就係懶到極點嘅中文。因為只要喺一個名詞後面加上呢一堆性啊、化啊、度啊嘅字，後面即能跟上「上升」、「下降」呢一類詞語。基本上其他優美精準嘅詞語都唔需要再學，仲可以俾到人，好似好專業、好科學嘅感覺。

• 所有加「被」字嘅被動句式都係歐化中文。漢語入面，「被」字有着負面含意，例如大家耳熟能詳嘅「被失蹤」、「被自殺」、「被自願協助調查」，就係正確嘅負面用法。反之，例如「被晉升」、「被讚賞」等等，就係正面用語加上負面「被」字古怪嘅用法。

• 常常濫用「一個」。例如「他是一個好人」，直接寫「他是好人」就可以。

• 「高官們」、「議員們」係想表達外語嘅眾數，但其實中文，係唔需要下下加「們」。

• 英文裏面文法一定要有主語，係中文嘅語法唔一定要有主語。例如「這個很厲害啊！」當中的「這個」是多餘的，直接在前文後理寫「很厲害啊！」即可。

• 例如「關於僭建同貪污嘅問題，基本係唔存在嘅。」當中「關於」、「問題」、「基本」、「唔存在」，全部都係多餘，係用英文諗咗，再用中文講一次出嚟嘅句式，腦裡面句英文好可能係「With regard to whether or not there involved any illegal structure or corruption, the answer should be no basically.」，營話公式、保持距離嘅語感，其實直接講「僭建或貪污與否，均無涉及。」就可以。但係……well，可能反覆啲、累贅啲嘅句式，講嗰位仁兄，會比較講得出呢句「人唔笑狗都吠」嘅說話掛。

完全無歐化現象嘅中文，唔一定係最好，始終語言係活嘅，會不斷演變。但如果可以讓中文變得更簡潔通順，漢語之美就能夠保持。同保存繁體字之美又或者廣東話之美，同樣重要。

教育局，自己諗下啦。

有興趣多了解歐化中文嘅朋友，可以睇埋維基百科歐化中文。但識繁體字嘅朋友，應該唔可能睇唔明啦，係咪？

text / Tyler Li

(圖片來源：am730)