是日噏day：男友影相影極都唔滿意，問題會唔會喺女友度？

網絡上，經常見到好多文章，教男朋友點樣幫女朋友影相。呢啲從技巧層面出發嘅教學文，第一下見到會嚇一跳，但通常最尾都係得啖笑。

問題在於——錯！重！點！你男朋友總係影唔到女朋友滿意嘅相，根本唔係技術上嘅問題，而係兩性關係上，結構性嘅溝通問題。

呢類文章之所以有市場，當然因為無數咁多女朋友，都會埋怨男朋友影自己影得唔靚。

我就問過幾位專門拍攝人像嘅攝影師朋友，呢種俾女朋友埋怨嘅情況，有冇係佢哋身上面發生。得出來的答案，竟然全部都係：「梗係有啦！嗰啲教學，根本全部都係廢嘅。唔理你技術有幾好，本身你係佢男朋友呢個事實，已經注定你點影佢，最尾都係陣亡收場。

「情況就等於家長自己做小朋友嘅補習老師一樣，兩者嘅親近關係，本身就係原罪，係永遠都唔work架！唯一嘅解決辦法係，如果有朝一日你唔再係佢男朋友，就咩問題都冇晒架啦！」

點解專業攝影師會咁樣講？又點解連專業攝影師都解決唔到「男朋友影自己影得衰」呢個問題呢？

原因是咁的：

1、尋找「1號樣」

每個女仔心目中，自己影相邊個角度邊個樣靚，都有一個好鮮明嘅印象。自己揸機selfie，捕捉呢個「1號樣」嘅拿捏，自然手到拿來啦。

但係當另外一個人負責揸機，拍攝者唔係佢心入邊嗰條蟲，當然只能夠搵到佢自己覺得靚嘅樣去capture。所以好多時女仔話男朋友認得佢唔靚，其實真實嘅原因係，只係男朋友影唔出佢心目中最公式化嘅嗰個「1號靚樣」。

而除咗1號樣以外，大部份嘅樣貌，被拍攝者自己睇返，好多時都係覺得怪怪的，情況等同於，大部份人聽返自己錄音把聲，都覺得自己把聲怪嘅道理一樣。

2、太快蓋棺定論

有啲相，係需要少少時間睇吓睇吓，先會發覺「其實我呢個樣都幾好睇吖。」如果你係一個陌生嘅專業攝影師操刀，禮貌上女仔都唔會咁快裁定你影得佢好核突。好多時結果係，被攝者睇下睇下，又會覺得張相OK。

但���況如果換着你係佢條仔，女朋友一來唔會俾面你，二來亦唔會有耐性同你慢慢消化下張相。望到張相嘅1秒之後——喺仲未有時間消化嘅情況底下——佢已經會裁定「喂啊！你認得我咁樣衰架？」，未必係張相唔靚，而係佢根本未有時間去消化，一張唔係「1號樣」嘅相。

3、男友未影得滿意就急住check相

影相呢家野，除非你係selfie，又或者能夠分裂多一個自己出嚟幫自己楂機，否則，好嘅照片一般都需要時間慢慢試出嚟。但偏偏，好多女仔，影咗兩張就急不及待要睇影成點。

所以，當你頭兩張相，仲試緊咩角度影得佢靚嘅時候，正打算第三張開始嚟真之前，佢已經：「喂！睇吓睇吓！」而如果你第二張相都仲未影得佢靚，已經好有可能會聽到女朋友問：「點解你可以影到我咁醜架？」。

4、「指導」得太密

「你試下高啲影埋黎！」「嗱！你一陣跪低，低炒影我！」「左D！唔係唔係！再左D！唉！又左得滯！」好多女仔嘅投訴當中，就係埋怨點解男朋友唔識得自動波影靚自己，但偏偏絕大部份嘅情況，女仔都係控制住個男朋友點影。

面對專業攝影師，當然唔會出現呢種「指導拍攝」嘅情況，但對住自己男朋友，就會啦。形成咗一個兩頭唔到岸嘅情況——相片效果，一定冇自己揸機selfie咁得心應手；同時，卻又俾唔到空間男朋友去試咩角度先影得好。

結果呢？就係點樣「指導」都影唔出好嘅效果。所以如果能夠好似俾陌生攝影師影嘅時候一樣，少一點「指導」，效果可能更佳。

5、太多打擊

情況等同於小朋友返學，又或者大人返工，如果每次都比老師又或者上司柴台，事情又點會做得好呢？同理，如果女朋友每影兩張就check相、「指導」，再繼而交出負面嘅評語「究竟你識唔識影架？」、「你根本都冇心影。」、「我唔明佢點解可以影到咁核突。」、「哇！影到我好肥囉！」就算本身有心影靚你嘅男朋友，鬧多兩鬧都冇心機啦——「既然點影都係錯，咁求其啦。」「又係你話咁要用呢個角度影你，影完你又話影得衰。」

之後就會墮入惡性循環，女人越鬧，男人影得越無心機越衰，女人就再鬧得佢再甘D，周而復始。

所以，與其埋怨男朋友埋怨到佢冇心機影自己，倒不如嘗試下逐步逐步俾啲鼓勵佢，等佢更有動力認得你靚啲（就好似我女朋友咁。對！這是頭盔！無誤！）。

如果突破唔到以上所講，因為關係太親近所以引發嘅操作問題，就算俾個世界級嘅攝影師你做男朋友，最尾都係會影得你樣衰的。

text by Tyler Li (facebook: 泰兄）

（圖片來源：Kukuh Himawan Samudro)