呂爵安Edan粉絲後援會一年內三度解散 過千萬會費懷疑下落不明

MIRROR成員Edan呂爵安嘅粉絲後援會(EIFC）近年是非不斷，後援會喺尋日（1日）發公告宣布於本月底停止運作，包括停用及關閉多個社交平台帳戶，現時處理Edan生日周邊（紀念品）等跟進個案，並聲明會與新團隊商討後再轉移應援資金，但未有交代現時EIFC嘅資金有幾多、點樣合法而安全地不被挪用等細節。

Edan支持者加入EIFC需要俾400蚊會費，用作支援Edan新歌新戲嘅宣傳廣告開支，以及製作應援打氣物資，而EIFC會員亦有優先抽飛出席Edan嘅活動。消息傳出後，有報導指粉絲後援會一筆近千萬元嘅會費懷疑下落不明。據知EIFC會員單係喺通訊平台群組已經有超過5千人，保守估計單係會費已經超過2百萬元，另外加上其他紀念品收益等，EIFC座擁近千萬資金並唔出奇。

爵屎（Edan fans嘅稱呼）對於EIFC再次解散感到不滿，唔少人更喺通訊平台上投訴，早前透過EIFC買應援物但冇收到貨，聯絡會方但冇人回覆。更有人聲稱因為填錯資料，EIFC以此為由拒絕出貨，結果俾咗八百幾蚊得個桔。即使苦主願意俾多一百蚊行政費更改資料，EIFC嘅客服都係唔肯交貨。

Edan fan club去年爆出內訌糾紛，有份管理嘅團隊成員大爆黑幕，公開內部通話截圖，指團隊大有問題，唔單止動輒就叫其他「爵屎」做「白卡」，更疑似黑箱作業，設立黑名單阻止佢地唔喜歡嘅爵屎抽演唱會飛。由於負面新聞不斷，去年十月Edan嘅fans後援會宣布解散，當時有報導指後援會有收會費，涉及金額高達七位數，後援會解散一度令人擔心會費去向。今年初，Edan後援會選舉新管理團隊，多位fans自行組閣角逐，但有fans爆料指，當選嘅新團隊中疑似有成員係來自之前引起爭議嘅舊團隊，並且指控有人懷疑掩飾個人身份，堅稱同舊團隊冇關係，令其他會員投票時受到誤導。傳聞爆出後，Edan fan club管理團隊再次宣布解散。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！