是日噏day：遇上剛受情傷的她，to be or not be？

感情呢家野，本來就冇所謂有絕對，又或者有啲咩必勝法則。

但有個現象，你真係唔好唔信邪。據非正式統計（大量朋友+自身經歷），一個人類嘅愛情履歷表，真愛出同埋水泡出現嘅pattern，同蠱惑的槍一樣，總係梅花間竹咁黎。

所以逢親有朋友問我，有咩對象最需要提高警覺，我都答剛剛受情傷重創嘅人，最好唔好埋佢身。要奪取佢嘅心，同洪師傅要用入中路一樣：唔係咁易嘅。

遇上呢類人，最常發生嘅情況係咩呢？就係你會成為間場嘅水泡。最陰公嘅係，對方好多時對你做左樣咁嘅野，佢都未必想架喎。呢樣，亦都關係到點樣嘅人，最有機會follow呢個梅花間竹嘅pattern（始終唔係100%個個都係咁，唔rules黎嘅記住）——就係怕寂寞嘅人。

有一類人，非常唔OK自己一個人，無拍拖嘅感覺同埋時間，佢哋唔會識得去享受。單身對佢哋而言，只有煎熬，談唔上半點樂趣。相反，單身對佢哋嚟講，係寂寞嘅代名詞，冇伴侶嘅陪伴，會令佢哋周身唔聚財。

先前講嘅一類人，通常同前度真愛散咗無耐，就會好快同另外一個好可能係水泡嘅新歡一齊。但另外有一種，可能同前度分左手好一段時間，下一個都好可能係水泡嘅——就係愛得非常用力嘅人。

呢類人一般比較死心眼，反為可能好耐都未拍另一次拖。佢哋令下一次戀愛對象慘變水泡嘅原因，係因為入面用黎愛人嘅energy用光晒，唯一解決嘅方法，就係搵一個「對方愛自己多過自己愛佢」嘅人黎回氣。但當佢受愛護一段時間後，力氣恢復過來，佢又會發現，原來佢唔係真係咁愛阿水泡，應該要重新出發，去搵過另外一個俾佢用力去愛嘅人先岩。

因為唔夠愛，所以新揾嗰個叫「水泡」，同樣因為唔夠愛，同水泡一齊嘅時候，總係會掛住上一個真愛。如果唔想同一個人一齊嘅時候，聽到首歌唱「我看透了她的心，演的全是他和她的電影」，自己會暗暗地眼濕濕，開始之前，就要留意下新嘅對象，會唔會係咁樣，如果佢同你講：「我其實唔係好鍾意我個ex架咋。」直情係正！可以放手一搏。

但如果佢上一個好鬼愛，但你又好鍾意呢一位好可能會當你水泡嘅人，咁應該點？

照去馬囉！唔試過點知啊？可能你同佢段感情，就係例外呢？係咪先？

text/ Tyler Li