是日噏day：對女友講 「我陪你乜乜乜」 VS 「我想同你一齊乜乜乜」，效果差幾丈遠

朋友間有港版Taylor Swift之稱嘅朋友H（唔係大家識嗰個），又有新戀情。我作為忠實粉絲，梗係第一時間出去聽故啦。

今次嘅故事，唔算juicy，但係仍然不失啟發性，再次證明港版Taylor Swift（下稱HKTS）並非浪得虛名。

話說HKTS新男友，因為事忙以及身子虛弱（？），一齊見面嘅時間唔多。工作完畢已經好攰，唔衝返屋企休息，可能分分鐘會咳個潤埋出嚟。所以每個星期，雙方見面嘅時間一般係得4個鐘。

戀情剛剛萌芽，HKTS梗係想多啲stick together啦。所以就諗出一啲方法，方便男朋友同自己見面。例如去一啲近佢嘅地方約會。男朋友係有出現嘅，但係仍然令到女方唔多高興。

我問：「係因為佢唔夠多時間陪你，所以你唔高興？」

港版Taylor Swift答：「唔係囉！而係每次我問佢出唔出嚟，佢都係話『好啊，我陪你去邊，做咩咩咩啦。』」

我：「咁我係真係有啲唔明啦，既然佢都肯抽時間陪你，點解你唔開心呢？」

HKTS：「個問題就係點解每一次都係『陪』我，點解唔係『佢想見我』、『想同我去邊去邊』、『我地一齊好開心咁去做咩做咩』呢？」

師父明白了！拿呢單野真係長知識架！

你以為「陪女朋友」就已經係一個攞足分嘅男朋友咩？原來唔係。

千祈唔好相信，《港女語錄》入面講，什麼「真正愛你的人，看的是行動，而不是嘴巴」嘅廢話。女仔好多時候需要嘅，係一句語言上present好嘅說話，而不是實際行動上做多定做少。

對於男士，要理解明明做嘅野係一樣，但係表達手法有唔同，點解會有咁大分別，確實係有啲困難。又或者舉個例子俾你聽聽，睇吓會唔會易啲理解。

假設你好鍾意食大閘蟹，你打算去一齊大拆一餐嗰個伴，你會想佢係「好啊，我陪你食丫。」定還是「正呀喂！我等咗成年終於有得食啦！」

又或者，當你打算約個劈酒局時，你會想有人「好啊！我陪你去飲酒。」定還是「行得架啦！今晚就劈你＿ ＿臭＿！」

當然，I know your feeling bro。你會覺得，就算嗰個人只不過係「陪你去」，都應該要appreciate佢，睇唔到有咩問題丫嘛。但come on，女兒國嗰邊啲村民唔係咁諗噃。佢哋需要嘅，係你好開心好興奮咁嘅樣，好想同佢地做某樣嘢，而唔係好冇feel地，「陪」佢哋做嗰樣嘢。

所以呢，邊個話特區政府啲高官，先要走去學做戲？其實每一條仔，約會前都應該拎住本《演員的自我修養》入廁所對鏡嗌返10句「我真係好想同你一齊咩咩咩咩咩」。

對於以理性思考問題嘅巴打，付出嘅時間同埋精神明明一樣，究竟需唔需要做呢一場戲，去令效果更好呢？

喂！你懂的。

text by Tyler Li (facebook: 泰兄）

（圖片來源：verywell.com）