曖昧得太耐其實係折磨！

有人話：「曖昧係戀愛中最甜密嘅階段」，對於一段成功發展成情侶嘅關係來說，是的。但對於一段長久曖昧不明嘅關係，曖昧真的讓人受盡委屈～尤其係渴望開花結果嘅一方。

曖昧係談戀愛嘅前菜，但亦可以係玩弄感情/搖擺不定嘅人嘅甜品。喺初戀之前，我自封為「單戀王」，由十幾歲去到廿三歲我都係活在單戀或是曖昧不明嘅關係裡。對我來說，嗰段時間真係非常痛苦！

#1 當所有人都以為你哋係一對，但你知道你哋只係朋友

每次曖昧都離不開瘋狂whatsapp，成日一齊出去，放學之後一齊走，Facebook/Instagram不停有對方嘅影子，於是身邊所有人都認定你哋係一對，愈畀身邊嘅人講得多，自己反而愈不安愈難受，因為你心裡知道，你哋只係朋友。

#2 對方不停畀假希望你

單戀嘅曖昧之所以會持之而恆，通常係因為接收到好多嘅假希望！呢啲假希望就好似毒品，一直吊你癮，令你離唔開，甚至愈陷愈深。所以每次有朋友話有人鍾意佢點算好，我都一定會話唔鍾意嘅請你拒絕！唔好吊住人條癮，等人以為有希望就繼續喺度等你！愛情，都有報應㗎吓！

#3 你試過明示或暗示畀對方知，但對方一直扮傻

我係嗰種鍾意就唔怕畀你知嘅人，所以每次鍾意人一段時間，我都會忍唔住表白。但我試過幾次，對方對我嘅表白whatsapp已讀不回，然後扮無嘢再繼續同我曖昧，好似從來都無事發生過。被拒絕雖然好難受，但被無視仲難受！因為你只會不停諗，究竟係佢真係唔鍾意我吖，定係佢未決定好？但佢唔鍾意我又點會同我曖昧喎⋯⋯無限嘅胡思亂想最折磨！