有啲時候講粗口可能係最好選擇

出爐港姐冠軍馮盈盈早前畀人搵到佢曾經喺Facebook講粗口批評政府，又用粗口為旺角佔領期間一單非禮案抱打不平，點知畀人話佢有損港姐形象。唔係掛，唔通你同傅穎一樣係講粗口會打冷震嘅人？人哋港姐呢啲叫敢言，同埋人哋只係喺個人Facebook打粗口，又唔係喺電視面前講。講粗口唔一定等於粗俗嘅，睇你點用啫，下面3個明星講粗口反而幾貼地：

1. 邵音音

音音姐早前出席活動都力撐馮盈盈爆粗係真性情，又指佢贏係憑實力，比賽又無講粗口，應該要分開批評。其實音音姐平時個人都夠火爆，爆粗簡直係家常便飯，但佢用得好應嗰吓先正。好似之前音音姐同戴夢夢拍ViuTV真人秀《跟住矛盾去旅行》，就不停大鬧做小三嘅夢夢，好似夢夢話只要對方支持佢，就算做小三畀人話都可以面對，音音姐就忍唔住話佢：「我真係想講粗口，你都幾X戇居㗎喎！」有睇節目嘅聽住夢夢啲理論，真係應該會忍唔住爆粗，音音姐真係爆粗有理，而且好多時候講嘢真係一針見血，果然有咁上吓人生閱歷。

2. 杜汶澤

杜汶澤向來言行出位，可能你未必喜歡佢，但有時佢敢言嘅行為都令人佩服。好似有揸開車嘅都明白停車場搵位泊已經煩，最憎就係隔離部車泊到出哂界，咁你叫人點出車呢？杜汶澤就遇過，仲即刻喺個人Facebook用粗口罵爆個車主無責任心守規矩，呢啲咁無公德心嘅人真係粗口問候先得。又或者大事如反國教事件，亞視曾經有個節目《ATV焦點》抹黑班學生係破壞派，杜汶澤就爆粗指責個節目：「好驚囉，我覺得用乜嘢立場都好，唔好冤枉同抹黑班小朋友，好X街。」呢啲時候用粗口真係好貼切。其實杜汶澤套《低俗喜劇》都係想同大家講粗口唔等於Cheap，講粗口嘅地道市井風味有時都幾正，而佢仲覺得講粗口可以增加氣勢同「說服力」添。

3. 黃秋生

秋生哥除咗演戲叻，佢霸氣嘅形象更加深入民心。作為影帝兼視帝嘅秋生哥，對於社會議題非常關心，力撐香港人，對於啲唔合理嘅嘢亦都好勇於爆粗指責，唔理其他人點睇。好似黃秋生試過喺微博用繁體字寫：「在中國寫中文正體居然過半人看不懂 哎 華夏文明在大陸已死」，即刻引起內地網民狂插，而秋生哥最後直接用拼音打粗口回應。都話咗簡體字係殘體字，個愛字連心都無點叫愛，講真話又插真係玻璃心，唔怪得秋生哥要用粗口啦。秋生哥甚至連動物保護都好關注，廣州早排有單圈養北極熊事件，秋生哥都忍唔住喺Facebook罵「X佢老味，北極熊夏天冬眠。真係乜都噏得出。」咁對啲動物真係無人性，對住呢啲畜生講粗口最Fit。

圖片來源：邵音音微博、ViuTV.com、杜汶澤Facebook、黃秋生Facebook、黃秋生微博