有片｜尹光被網民質疑「鹹豬手」抽林明禎水 大方回應：人哋鍾意講乜，由得人哋講

日前，「光B」尹光同「明禎BB」林明禎齊齊現身為聖誕活動揭幕，兩人合唱聖誕版《你阿媽大減價》之外仲大派心心，更加話嚟緊希望可以合作出新歌。「雙B」一齊合作當然吸引到唔少人關注，不過有網民就質疑「光B」喺同「明禎BB」做大心心手勢嘅時候有抽水之嫌。今日（20日）「光B」出席活動就大方回應事件，仲呻話已經習慣被屈。

佢哋兩人日前出席活動大派心心嘅時，「光B」將手擺喺明禎背後，明禎突然向後縮嘅一幕就惹嚟唔少網民質疑佢抽水，例如「擺明抽水😢😢😢」、「下！佢摸到人地會縮wor!即有問題啦～」、「合照根本無需要咁樣搭住人地有身體接觸，點解咁多人睇住個女仔俾人抽水都無人出聲😢」及「尹光只右手好不安份，請注意」等等。

「光B」今日回應傳媒有關指控嘅時候就表示當日係有掂到明禎背脊，不過係為咗示意對方企埋啲而非抽水，更話自己幾十歲人唔會諗同唔會咁做，亦指當日太太在場：「我都幾十歲人，唔會做，唔會諗呢啲嘢，嗰日我係有拖佢手，不過係佢叫我拖嘅，亦都有掂到佢背脊，係想叫佢行埋啲，我太太嗰日都在場，佢會睇實我。」至於被問到咁樣被網民屈會唔會嬲？佢就話：「唔嬲，把口喺人哋度，人哋鍾意講乜，由得人哋講，我冇做過。」

除咗澄清當日嘅事，佢亦都呻幾十年來因為被指係唱鹹濕歌的歌手形象而多次被屈，仲分享咗一次深刻經歷：「宣傳演唱會接受訪問，位傳媒叫我表演做掌上壓，點知個報道就話我做埋呢啲（鹹濕）動作。」

【睇片】