網民出PO比較李尚正李思捷好笑程度 李思捷一面倒被批：尷尬到想搵窿捐

第42屆香港電影金像獎於上周日（14日）完滿結束，憑《死屍死時四十四》提名「最佳男配角」嘅李尚正輸畀《白日之下》姜大衛，縱然落敗，但李尚正亦備受關注，被指於戲中飾演保安員入型入格。然而，李尚正其實出身自周星馳公司，遭周星馳賞識從幕後跳上幕前，曾演出《長江七號》、《西遊•降魔篇》和《美人魚》等多套電影，《美人魚》中「面癱」式演技深得周星馳和觀眾喜愛，及後亦因HOY TV王牌節目《空間大改造》及《臥底旅行團》表現出色被封「有線一哥」。於網上討論區中，有網民將李尚正與同樣出身自周星馳電影嘅李思捷比較，結果李尚正一面倒得到較多正評。

李思捷曾參加由香港商業電台為周星馳電影《喜劇之王》宣傳而舉辦嘅「喜劇之王訓練班」，獲得最優秀學員前五名。該網民於討論區以「李尚正vs李思捷」為題出PO，更寫道：「李尚正應該冇諗過自己要同佢比，李思捷一定覺得自己同佢唔同層次，真係世紀大難題」，大部分網民都傾向支持李尚正：「兩位都因星爺而令人認識，李尚正曾演星爺戲好笑得多，李思捷演導演過於浮誇」、「李思捷除左唱歌可能好聽過李尚正，仲有乜好過佢」、「本身李尚正成個書呆子咁，但愈睇愈正一，現代冷面笑匠」等等。

唔少網民更將二人嘅好笑程度作比較，指李尚正比李思捷好笑得多，李思捷只會令人尷尬，根本無得比：「李尚正係真心果種，有時睇佢講野你會想笑，李思捷係夾硬做啲野出黎話人聽佢好好笑」、「李尚正會用唔同方法去搞到你笑，一個gag唔得去下一個，做下靶得來自然。李思捷覺得自己講乜都係全世界最好笑，依家係佢俾機會你去敬仰佢嘅搞笑能力，就係咁」、「李思捷就真算數啦，聽到呢3個字已經覺得好尷尬」、「阿正搞gag唔好笑既時候，只會覺有有dd尷，繼續睇，可能下個gag會好笑，李思捷搞gag唔好笑既時候，會即刻諗『你做乜野姐』 跟住轉台」、「阿正係令人尷尬得黎覺得好笑，李思捷啲尷尬係想搵窿捐」等等。又有網民覺得李思捷只識扮女人及講黃色笑話，唔係識搞笑。過去李思捷節目《思家大戰》就曾被網民批評只靠低俗嘅答案去令觀眾發笑，例如好多問題都係想引導啲嘉賓講出與性相關嘅答案，直言低俗及尷到起雞皮。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！