杜琪峯稱鮮浪潮最著重原創 不干預拍攝 寄語「聰明啲做人」

【獨媒報導】鮮浪潮國際短片節於周六舉行本地競賽頒獎禮。過去三屆有參賽短片未獲發准映證或被刪走部分片段，今屆入圍作品則全部獲發准映證，成功上映。主席杜琪峯稱讚，今屆作品比過去質量較好，但亦認同現時拍攝題材「少咗」。他又稱，「最重要乜都可以講」，成立鮮浪潮時最為著重原創，不會干預拍攝，惟指參賽者須為自己作品負責，寄語「聰明啲做人可以，有啲位閃吓、避吓啦，留得青山在，那怕沒柴燒」。

《鬼妹》奪大獎評審指具時代感 杜讚今屆作品「講到嘢」

今年鮮浪潮共頒發六個獎項。「特別表揚」及「最受觀眾歡迎獎」由《眩光》的鍾易澄奪得；「最佳導演」由《黑羊》的曾楊奪得；「最佳攝影」由《極樂》的李昊奪得。最為矚目的「鮮浪潮大獎」，則由林慧妍執導的《鬼妹》勇奪，同時獲「最佳編劇」。評審評語形容，《鬼妹》的劇本紮實呈現外籍佣工難處，又指故事觸及疫情、身份認同、移工等的當代議題，令作品具時代感。

對今屆得獎作品有何感想？杜琪峯認為，相比第一屆作品更「講到嘢」，又指他們攝影上雖然並非特出，但非常有心機：「由零開始乜都唔識，製造到啲咁嘅嘢出嚟，咁你又無辦法覺得佢唔好嘢。」

認同拍攝題材減少 指最重要是政府「容許幾多嘢」

但杜琪峯認同，現時拍攝題材「少咗」，指每一個地區都會進入文化低潮，認為最重要當地政府「容許幾多嘢、可以講幾多嘢」；他又指，若冀行業生長得好或有成果，「就要同嗰個大自然對拼，咁你整整吓就會死㗎喎，因為生埋另一邊，硬晒咁向個面個邊走，咁你死得啦。」

被問到現時社會氛圍如何影響創作，杜琪峯稱：「大家都知嘅事啦，唔洗我講啦。」他鼓勵創作人遇到問題時：「唔好驚，要諗聰明嘅方法做好你藝術世界嘅嘢，電影係好闊㗎，闊度不得了，無錢都可以拍到。」

香港戲院現結業潮 杜琪峯：該淘汰就淘汰、心態要平靜

香港近年亦出現戲院結業潮，包括UA全線戲院、嘉禾啟德、銅鑼灣總統戲院，以及即將結業的朗豪坊Cinema City。杜琪峯指是必然，因隨著科技發展，「有啲嘢要淘汰，該淘汰就淘汰」。他寄語有心拍電影的年青人心態要平靜，稱「我自己都學緊」，要將「火氣」減低少許，先聚焦「藝術係咩嚟先」，亦明白獨立思維及自由的重要性。